夏日熱辣辣~好熱！好熱！近排天集炎熱，除左把口想食冰淇淋，在下嘅眼睛都好想食冰淇淋呀。所以今次開箱嘅係既符合主題，又非常清涼造型呀。 點解會有呢個企劃同Precious Figure嘅介紹可以參考上一篇 [特別企劃 - 笑容守護計劃]"開箱"雷姆-Precious Figure Original Campaign Girl ver. 先上外盒圖 盒四面都係簡單嘅實物圖。由於擺放一段長時間，盒面已經有啲殘舊。 盒入面嘅內容物，保護做得好充足呀。(呢個系列嘅基本配備) 基本四面圖。呢套泳裝包含左女僕裝嘅元素，性感可愛加上有雷姆自己本身嘅特色，設計得非常好，整體都見到啲喱士邊做得好靚。在下手上嘅係特別版，普通版嘅泳裝主色係粉藍色。 體態上都係一貫呢個系列嘅高水準，健康性感好睇唔會太浮誇，高度還原動畫。動作就非常可愛，加上表情有種討抱抱嘅感覺。 透明色底盤有簡單圖案，通透度高又唔會太單調。 面相方面，唔近睇會忽略左眉毛，其實呢個表情好尷尬。正面觀賞角度可能唔係最好睇，面型有怪怪地嘅感覺，有需要調一調角度。 少少由下望上嘅角度就會見到還原度極高嘅面相，Kawaii Ne~ 同現實一樣，個人認為呢個三七面係最靚。 頭飾有女僕元素，好配合。上面嘅花花裝飾有種薄片嘅感覺。 頭髮背後有啲怪線，同系列嘅其他款都有呢個問題。 腹部分出現好睇嘅馬甲線。(望望自己😢) 呢個近鏡主要想展示泳裝仔細嘅網織質感。可以隨便欣賞。 腿腿腿腿腿，均勻自然。 透明嘅薄紗裙擺，個人認為有點點厚重感。兩條腿同下身泳裝密合度都唔夠。 最後在下係腿度，發現一啲奇怪嘅透明膠質不明物體。在下發誓呢啲物質並非屬於本人。