玩物喪誌

新鮮滾熱今日一收到就馬上開箱！ One Piece Grandista系列專造一啲大比例又抵玩嘅Figure，不過以在下所見都只係出過五個角色(如果冇數漏)。今次呢款Figure嘅特別之處就係佢有特別處理啲陰影，等大家有一種睇緊彩色漫畫嘅感覺。呢種漫畫風格嘅One Piece Figure其實之前都有推出過，不過佢地全部都係以路飛為主題(在下收購中)，而且今次就係首次將呢種風格用係卓洛(在下一直叫開索隆，要叫番口叫番港譯嘅名)上面。 上盒圖s！ 正面同側面都係透明可以睇到實物。外盒設計非常有漫畫味道，如果唔係內裡包裝咁多，在下可能會將隻Figure直接留係盒入面觀賞。 由於飛唔到日本，所以係係香港訂嘅代理版。其實白證同金證係同一條生產線，所以品質唔會有太大分別。 三把刀已成一體要另外安裝。噢，係在下最愛嘅簡潔型底座。 刀部分安裝其實需要些少技巧，還好手嘅設計係軟軟地，等在下擺呢三把刀嘅時候都容易啲。 型到在下都唔知講乜好，可以話係Perfect池。 度一度，高度係大約28.5cm，比例算係幾大。 面相還原冇十分都有九成嫁啦。模擬陰影嘅上身都唔錯。 身體胸肌一樣有打陰影。手袖有非常好嘅皺摺。 連手指都有打陰影，非常仔細。 衣服上面嘅皺摺同埋陰影都係無可挑剔，就是正。 守護千陽號呢個責任就交俾你啦

由於啲Figure愈買愈多，真係要爽啲手開快啲。開完一大堆雷姆之後又係時候開下老婆啦。 今次呢個BWFC系列要特別介紹一下。BWFC全寫係Banpresto World Figure Colosseum，姐係眼鏡廠Banpresto舉辦嘅造型大賽。BWFC本來係本地嘅「造形王頂上決戰」演變而成嘅全球性大賽，吸引全球嘅原型師將自己嘅作品放上舞台。通過預選嘅作品除左可以參加決賽之外，仲可以將佢地嘅作品商品化，在下入手嘅呢款Figure就係當中之一。 在下係非常有目的性地入手呢一隻Figure，由於呢一個動作非常有動感，係少數手持魔法天侯棒嘅姿勢，而且係極少數圓蛋糕島裝扮嘅Figure，令在下非常想收藏。 廢Up完，馬上上盒圖。 外盒上面見到原形師嘅靚仔樣，據聞呢位原形師非常擅長女性造型，不過在下冇考究。 雖然冇特別描寫，不過在下都相當肯定呢個造型呢個姿勢係來自圓蛋糕島誘惑森林嘅篇章。當時娜美俾夏洛特布璃叡(隻字超難打)從背後捉住左，娜美靈機一動，係乳溝拎出魔法天侯棒從布璃叡手中掙脫。 再睇睇內容。 唔需要使用偷拍模式，今次直接放福利俾大家睇。 正如頭先所講，呢隻Figure嘅賣點就係非常有動感，整體服裝嘅上色都唔錯，姿體動作都有一個非常高嘅分數。 面相黎講，個人覺得還原度有99%。當然唔係講還原原著入面個痛苦樣啦。頭髮嘅處理都係好好，望上去好自然。 呢張相除左俾大家欣賞偉大嘅娜美之外，仲可以睇到造形師將娜美收係胸前嘅BIG MOM生命卡都整左出黎，真係超有心。 連"Lola"個名都有寫埋上去。 一雙美腿不挑剔。 比較可惜嘅地方就係手腕嘅指卡比較求其。另外呢個推棒手勢都幾Lady。

 馬不停蹄，趁有時間即再開一隻。而完成呢一款之後，在下都開始接受現實走出陰霾，所以呢個特別企劃都要暫告一段落啦。 點解會有呢個企劃同Precious Figure嘅介紹可以參考上一篇 [特別企劃 - 笑容守護計劃]"開箱"雷姆-Precious Figure Original Campaign Girl ver.  呢一款景品一推出嘅時候，在下真係馬上心動起來。果個笑容，果個動態，果身裝束完完全全地令在下怦然心動。不過非常可惜出來嘅成品有少少令在下失望。 先上盒圖 標準長盒。盒面見到雷姆嘅超級大頭，呢個笑容真係好難忍手呀。而成身泳裝加一件薄紗，仙氣道直線狂飆。 打開入面，已經見到出現問題。就係上下半身竟然唔同色，呢下真係扣哂分。 先睇睇實物四面圖先。 整體來講係非常有動感活力，但係正面睇會發現成隻Figure個重心偏左去右邊，感覺有啲奇怪。 如果在下將腳底嘅椿調整番個重心，感覺似乎好番少少。 30度係最佳觀賞角度。 面相部分，呢個笑容真係冇得頂。 但係頭髮部分就有好多瑕疵。 雖然健康嘅胸部好吸引，但都要留意泳裝嘅繩有溢色問題。 再一次見到上下半身唔同色嘅問題。另外會見到白色外衣有啲唔平整嘅顆粒。 撇除同上半身唔同色呢個問題，其實雙腿係做得唔錯。拖鞋部分都做得好細緻。 大衣想做到隨著跑動飄起嘅感覺，但睇上去就好唔自然，好似衫尾突然飛起左咁，形成左一個好奇怪嘅角度。 另外要講講，手指位冇打磨有瑕疵。 總結就係整體唔錯，但係瑕疵極多。