"遊戲"《對馬戰鬼》還Game文

 而家先講呢個遊戲其實有啲Out，由於在下係等朋友玩完先借黎玩(《The Last Of Us Part II》嘅慘痛經歷令在下暫時都唔敢買新Game)，玩完之後又忙左一段時間，所以而家先發表一下小小對呢個遊戲嘅感想。

玩嘅時候冇刻意Cap圖，唯有用拎獎盃自動截圖頂住。

輕輕介紹一下呢個遊戲，《對馬戰鬼》以元日戰爭作為藍圖，玩家扮演對馬島嘅武士境井仁重奪被蒙古大侵略嘅對馬島。因為種種經歷以及國仇家恨，境井仁為左重奪對馬島而變得不擇手段，漸漸背棄武士道，化身為令人聞風喪膽嘅戰鬼。

Hardcore遊戲?

初初見到呢個遊戲嘅畫面同風格，令在下不禁聯想到《仁王》或者《隻狼》呢類硬核遊戲，懷住一種又想玩又怕過唔到關嘅心情去玩。點知一切都係在下諗得太多，相比硬派遊戲，《對馬戰鬼》比較偏近《刺客信條》，除左一啲劇情上嘅對決之外，大部分戰鬥嘅自由性都係好大，唔同流派嘅玩家都可以用唔同嘅方式去攻略敵人嘅陣地，鍾意射箭又得、鍾意玩暗器暗殺又得、或者光明正大行埋去開拖又得，玩到悶悶地可以轉個打法，遊戲性都幾高。最重要嘅係，主角嘅成長系統同埋配裝係會支持所以流派嘅玩家，好多好強勁嘅招式係初期已經可以學到，例如鍾意直接開拖嘅好快就可以學對峙連殺，整個遊戲體驗就是爽。

M屬嘅老友都唔洗怕，好似在下咁比朋友慫恿左玩致命難度，初期只要中一刀就瓜柴，都咪話唔爽。

濃厚和風味道 惟武士文化著墨太少

呢款遊戲一大賣點就係濃厚嘅和風味，唔知其他地方點睇啦，相信好多係香港嘅朋友都對日本嘅文化好有興趣，《對馬戰鬼》就正正滿足到大家「去日本」呢個慾望。遊戲入面出現左好多日本地道嘅文化，例如浸溫泉、拜神社等等，係故事入面玩家就真真正正可以體驗一下做個古代日本人嘅滋味，係幾寫意嘅。遊戲入面仲有好多唔同嘅服裝俾玩家揀，仲可以了解到唔同服裝背後嘅故事，扮靚靚又學到野，一舉兩得。

除左做一個古代日本人之外，更特別嘅係，呢個日本人係一個武士，而呢一點係在下認為比較可惜嘅地方。雖然遊戲入面玩家可以做一啲武士會做嘅野，例如劈竹、寫排句詩等等呢啲武士專屬嘅行為，但係對於始終對於武士道文化嘅描寫比較流於表面，例如武士經常掛係口邊嘅榮譽究竟係乜野﹖武士係點樣睇生死榮辱﹖比起武會做啲咩野，在下更想知嘅係武士諗緊啲咩。而主角後面化身為戰鬼嘅過程亦都太輕描淡寫，個人認為有少少浪費左武士文化呢個主題。

《隻狼》截圖

驚喜嘅體驗

係遊玩嘅過程在下係好有驚喜，首先就係主角境井仁嘅聲優係中井和哉。佢係乜水﹖以下呢個角色就係由佢擔任聲優。

身為海賊王忠粉嘅在下當然係非常之咁有親切感，而且兩個角色都係一個劍客，所以聽起上黎真係非常之有味道。故事中段仲會出現一位配角，而果位配角嘅聲優就係擔任烏索普聲優嘅山口勝平，估唔到佢地對馬島度再相遇。

另外一個驚喜嘅地方就係角色戰鬥嘅流暢度。初初玩嘅時候，在下覺得角色嘅招式非常單調又唔流暢，但經過一段時間學習架式之後先發生係在下誤會左。角色嘅刀法行雲流水，遊戲嘅打擊反饋又做得超好，所以同敵人對劍嘅戰鬥都係非常之爽。遊戲入面仲有一個招架同閃避系統鼓勵玩家把握時機拆解對方攻勢，直擊對方要害，爽快乾淨俐落，玩開動作或者硬派玩家一定會有超爽嘅體驗。

敗筆︰好長好悶呀~~~~~~

最後要講下就係呢個故事嘅敗筆，就係個劇情真係好悶。呢度唔係講緊個遊戲好悶，而係啲劇情故事真係悶到飛起。正如岩岩提到，故事對武士文化描寫流於表面，其實係整個遊戲都狼呢個問題。劇情部分多數都係一大堆勁長嘅對話，但係都係一啲冇感情嘅敍事式對白，真係勁悶。故事有好多關於角色嘅支線劇情比玩家去了解啲角色，但係嘅支線劇情完全做唔到呢個效果，個感覺就係突然發生啲事，跟住打打打，跟住收工，跟住又發生事，跟住又打打打，係極度無聊，仲要有頭冇尾咁。最慘嘅係，所有呢啲劇情都係冇得SKIP。

仲有一啲過場畫面真係超長氣，例如每一次決鬥之前都會有一輪舊日式電影果種對峙，睇住雙方對望一輪跟住慢慢拔刀。頭果一兩次睇係幾有Feel，但之後就求下佢快啲打。最慘嘅係，所有呢啲過場都係冇得SKIP。

整體主線黎講係唔錯，主題都OK。問題在於個節奏實在係太慢，極度拖戲。例如一開始整個工具攻打金田城都可以搞咁耐，地圖又大，尤其係最後一個地圖，方圓十里都係得啲花花草草，成個氣氛好平靜好舒服，完全唔似打緊仗，有時真係玩到訓著。

所以，個敗筆都係係劇情方面。本身遊戲嘅主題係非常好，遊戲性性能上都係高水平，但係劇情太表面，節奏太慢，個人感覺有少少浪費左。