"遊戲"Resident Evil 3 Remake 封片文

Resident Evil 3 Remake 早幾日先推出，疫情關係冇街去嘅在下當然日以繼夜夜以繼日咁瘋狂打。經過不懈嘅努力(其實唔難)，好快就達成全成就可以暫時封片啦。當然除左冇得出街之外，呢款遊戲滿滿嘅驚喜同賞心悅目嘅畫面都係吸引在下追玩落去。事不宜遲，馬上為大家呈上遊戲報告。

有興趣嘅可以睇埋
全紀錄[瘋狂馬拉松式1日打爆機]Resident Evil Remake 3
"遊戲" Resident Evil 3 Remake Raccoon City 試玩報告

劇情及遊玩長度

重製版幾乎將成個遊戲劇情重寫，而且將Carlos嘅劇情部分加多左，同時又非常適當咁保留一啲原有劇情，等舊朋友玩落去都又有回憶又有驚喜。當然，改寫嘅劇情依然係符合整個系列嘅故事線，十分合理。但係雖然劇情改寫左同增加左，但係成個故事依然偏短都係不爭嘅事實，係原版有一個公園墓園嘅探索竟然完全消失左。在下第一次通關連探索都只係用左四個半鐘，甚至熟悉左路線之後，只係用一個鐘左右就可以打爆機。相比起二代就算熟悉哂所有路線同用強力武器都要用大約二個鐘頭去過關，仲要可以用另一個角色走另一個路線。

其實整個遊戲有好多部分都可以增加劇情，在下就覺得以下幾個情節嘅劇情都可以加強。

1. Carlos係警署出發去鐘樓救Jill呢段路其實好大發揮
2. 鐘樓場景明明都整左出黎，純粹作為打Boss背景實在太浪費，點解唔索性還原舊版Jill係鐘樓嘅探險之後先打Boss呢?
3. Carlos揹住Jill去醫院嘅呢段路程都係好大發揮，根據劇情醫院係俾大量喪屍圍住，闖入去醫院呢段絕對有得玩。
4. 係Jill接受疫苗之後昏迷呢段期間究竟Carlos做緊啲乜，點解佢會突然係地下控制室出現，呢一段非常之值得增加劇情去交代。

你好快啲解釋下點解你無啦啦係度出現

氣氛營造及畫面質素

畫面質素黎講，算唔上有咩野進步，維持住二代重製嘅高水準。相對二代重製，今作出現在好多更加驚險場面，各種爆炸場面或者複雜嘅動作畫面引擎嘅處理都非常之順暢，驚險嘅劇情配合住出色嘅運鏡，每一個過場動畫都好似睇緊電影咁震撼，尤其係遊戲早段比追跡者Nemesis瘋狂追擊嘅畫面真係非常有衝擊。

除左驚險場面之外，遊戲入面嘅陰森恐怖氣氛營造都非常出色，尤其係後段醫院部分，陰森場景配上一啲個人認為比上一集更傻秀嘅恐怖音效，仲要周不時有啲喪屍冷不妨咁彈出黎，係屋企熄哂燈玩都咪話唔驚。

突然跌條屍落黎真係嚇到成個彈起

另外係畫面呈現上個人認為兩位主角頭髮飄逸嘅呈現令人十分驚艷，Carlos同Jill飄逸嘅秀髮會跟隨角色嘅動作擺動，真實同自然，唔知張顯示卡用左幾個記憶體去演算佢地啲頭髮啦。

Jill嘅一頭秀髮會一路跑一路飄，好好睇

遊戲性

遊戲性黎講確實係一個小失望嘅地方，因為在下玩落之下感覺成個遊戲偏向著重喪屍打擊方面，生化危機系列一向最重要嘅解謎元素嘅比重就降到幾乎冇哂，整個故事只係勉強淨哂兩個解謎關卡(其實真係好勉強地算係解謎)，同二代重製甚至係三代原版比較，真係差天共地。冇左呢啲解謎要素實在令「恐怖生存」嘅感覺大大下降，因為冇左一種被困嘅感覺。除此之外，一堆敵人同頭目都係用火力壓制，冇咩野特別嘅對應方式，過關好似非常單調。

但係今集增設嘅閃避系統確實係一個唔錯嘅設定(其實原版都有呢個系統，不過就唔太成熟)，可以閃開敵人攻擊，Carlos甚至可以作出反擊，比起以前只能夠靠走位黎避開攻擊更加有寫實感同可玩性。

閃避呢招練到好嘅話，真係可以實現無傷過關

另外就要講講遊戲入面嘅隱藏獎勵。由於上一集想得到無限火箭炮等等神器要以S+評價通過最高難度硬派，但係就比好多玩家炮轟，反問Capcom點解一定要完成挑戰先可以用到呢啲武器。之後Capcom讓步將無限火箭炮以付費DLC形式上架，等一啲完成唔到挑戰嘅玩家都可以享用呢啲武器嘅爽度，但係依然被玩家鬧爆話Capcom食錢。在下認為Capcom嘅做法非常合理，遊戲入面設定呢啲隱藏獎勵去鼓勵玩家挑戰高難度有咩野問題？而且呢種獎勵模式一直都有，遊戲嘅商品說明又冇講明話無限火箭炮係包含係遊戲入面，得唔到有咩野好嘈呢。之後以付費DLC形式上架，而且價錢都唔係太貴(好似港幣十幾蚊)，都係一種要爽就要付出嘅教學，「唔比心機研究點過關，就比錢啦」。

點解咁長篇大論去講呢件事，因為今集Capcom竟然冇企硬，係呢件事上面再讓一步。在下破關之後，發現神器無限火箭炮嘅獲得方法由高難度嘅挑戰，變成單純嘅儲印花換領。當時在下嘅心情非常複雜，雖然因為無限火箭炮更加容易得到而且心中暗喜，但係亦有一點點嘅失落。回想時二代挑戰硬派S+嘅過程，係好有壓力嘅，事前研究好最有效嘅過關玩法，玩嘅時候有超大嘅壓逼感，隨之以來嘅就係極大嘅成就感同埋無限武器嘅爽快體驗。如果呢啲體驗係咁容易就得到，真係冇哂意義。今次嘅高難度通關變成乜野獎勵都冇(有嘅，有少量印花，但係可以以其他成就代替)，真係好冇動力去認真挑戰。

今次啲隱藏要素擺哂出黎任你揀

即使冇獎勵，高難度都係要挑戰嘅。今集就新增加左惡夢同地獄兩個難度，隨左單純增加敵人強度，物資減少之外，敵人嘅位置仲會「好有心機」咁重新分配。在下強調係「好有心機」咁重新分配，因為重新分配嘅位置絕對睇得出係經過精心嘅安排，好多敵人都重新放置係一啲意想不到嘅地方，同時又取消左一啲敵人，真係令人又驚又喜。在下係玩呢兩個難度嘅時候好似玩緊一個新遊戲咁，同第一次過關有好唔同嘅體驗。

明明之前冇呢個爆頭仔，一個唔為意就俾人Dap左嫁啦

主要頭目設定

第三集嘅招牌敵人一定係Nemesis唔洗講咁多。係遊戲早段佢嘅表現係非常之值得稱讚。攻擊能力高，移動得快，全地圖對主角窮追猛打，成日冷不防係你面前飛出黎，壓逼感十足。不斷咁出黎，令到人覺得佢好煩，其實係一個出色嘅「角色」營造，因為佢只有追殺主角呢個目的。另外佢由以前嘅皮褸造型變為一啲密封膠紙包住個身更加設合佢作為一件生化武器，係一件「物件」嘅設定。

死追爛追，無負痴漢之名

但係佢跌左落水之後變左第二形態之後，似乎成個壓逼感消失左，完全冇哂威嚴，能力上亦唔見有咩野提升，感覺反而仲廢過未進化。呢個其係都係一直以來生化危機嘅通病，怪物設計以為大大隻就係勁，玩家就會驚，其實比起佢未進化之前更加冇威脅性。而進化到第三形態更加廢，變到好大隻，但係命中奇低，係惡夢模式以下嘅最終形態Nemesis打你十下先中一下，仲要傷害都唔係高，老實講真係對個Boss戰好失望。

惡夢以下難度嘅最終形態Nemesis只係一個巨形槍靶

不過呢個最終形態Nemesis終於係惡夢同地獄難度挽回少少面子。惡夢難度嘅最終Boss比硬派難度強超過一倍。惡夢難度嘅Nemesis嘅攻擊非常之進取，命中率仲大大提升，一個唔留神分分鐘俾佢連打打成肉餅。如果想打敗佢，一定要熟練閃避先可以閃開佢極具威脅嘅攻擊。

彩蛋，舊版元素及與前作互動

黎到最後就係我非常非常之滿意嘅地方，呢款重製版入面滿滿粉絲福利呀，相信一眾老玩家見到遊戲入面好多小彩蛋都會好有驚喜，例如一開始Jill房間入面嘅牆上面就會揾到一張一代出現過嘅S.T.A.R.S.成員大合照、Brad對住直昇機大叫救命呢啲情節，玩過一代嘅玩家一定有驚喜。

記得第一集佢做過啲乜嘅朋友一定會心微笑一下

另外就係原版三代嘅一啲經典場面或者對白。雖然整個故事大改寫，但係某啲舊作嘅畫面都以不同嘅形式出現，例如Jill係原版最後有一幕用麥林怒轟死唔斷氣嘅Nemesis，講左一句好經典嘅台詞「You want S.T.A.R.S.? I'll give you S.T.A.R.S.!」。今集Jill就係一場追蹤入面怒爆番呢一句經典台詞。


仲有其他經典元素都令大家回憶湧上心頭嫁。

經典嘅性感服裝絕對係生化危機迷嘅集體回憶

科學超電磁炮依然有保留

雖然入去警察局嘅由Jill改左做Carlos，但仍然無阻故事同二代重製嘅互動，比Leon早一日黎到警察局嘅Carlos見到警察局岩岩被襲擊嘅場面，解釋左好多Leon到埗之後見到嘅奇怪景象。槍店老闆Kendo亦都再次出現仲同Jill有互動。

呢段解釋左點解Marvin受傷。喪屍Brad都係其中一個經典回憶，不過係原版嘅時候，佢係係二代出場。如果係玩緊惡夢以上嘅難度，佢仲會出現多一次嫁

走廊兩個奇怪死狀嘅警察原來係比Licker襲擊

終於知道點解Leon一打開個Locker就有條屍係入面

就係因為Carlos係個更衣室玩爆炸，Leon大費周章先通過到呢度

總結

其實整體黎講，在下對於呢次三代重製係有小失望，主要係劇情上太短同時其實係有可以空白嘅地方可以填補，難得係畫質方面咁大提升，遊戲時間咁短真係好可惜。

係玩正式版之前，在下最期待嘅部分就係佢同二代重製嘅互動，呢一方面就冇令在下跌眼鏡，各種死狀都有還原番，如果有一個幕反映到Carlos同Leon或者Claire 係點樣互相錯過就Prefect池啦。