Final Fantasy VII Remake就上個星期就出左啦，在下玩左一個星期左右，完全感受到呢款重製遊戲滿滿嘅誠意呀，相信一眾FF迷都應該玩到不亦樂乎。在下就抱持慢慢嘆嘅態度去玩呢個遊戲，到而家都仲未爆機呀(卡關)，慢慢享受同Tifa一齊嘅時光。當玩緊一啲系列新作嘅時候，不禁會回想一下系列嘅前作，今次Throwback Thursday就回顧一下系列正傳嘅前作Final Fantasy XV。
注意:
(1) 由於在下玩呢款遊戲嘅時候冇截圖，所以所有圖片都係係網上面搵番黎
(2) 在下只有玩本傳，後面一大堆DLC都冇玩，所以以下所以心得都撇除所以後期DLC
準備好就上車啦喂﹗
 |
| 講得唔好唔好打甩我眼鏡 |
簡介
同以往作品一樣，Final Fantasy系列之間嘅故事都係冇任何連繫，XV有自己嘅故事同世界觀。故事大綱就好簡單，
路希斯與尼弗爾海姆呢個兩個國家本來一直打仗，直至尼弗爾海姆提出停戰協議，並且將附屬國特涅布萊耶王國嘅公主露娜許配比路希斯嘅王子諾克堤斯結為姻親。本來以為和平來臨嘅諾克堤斯就決定同幾個老友一齊去個旅行。就係旅行途中諾克堤斯收到亡國嘅消息，原來係路希斯比尼弗爾海姆背叛左，父王亦都慘遭毒手。於是佢同幾個老友要一齊要搵齊係先王陵墓嘅十三把幻影劍同六神嘅啟示去光復自己嘅國家。
人物設定╴靚仔靚女大合集
Final Fantasy 一向都多靚仔靚女(或者可以描述為MK)，今集同主角同行嘅有三位靚仔咁多，而且佢地各有特色，除左係劇情表現上面，同主角同行期間透過佢地之間嘅對話會見到佢地有好唔同嘅性格，為呢趟行程增添好多趣味。而且四個大男孩入面總有一個同玩家有共嗚，有憂鬱浪子諾克堤斯、知性男子伊格尼斯、男子氣概爆發嘅格拉迪歐同陽光男孩普羅恩普特，點都中一個掛。
另外靚女都係應有盡有，有活潑靈動型嘅車房女希德妮、有仙氣女神露娜、有蘿莉伊莉絲、姐姐型龍騎女艾拉尼亞，個個除左造型吸引，角色刻劃都好鮮明，係呢個遊戲入面各司其職。
 |
| 車房女希德妮好明顯係福利擔當 |
但係好可惜遊戲入面嘅大反派人設就差左少少，設計上佢能力強大同神秘，但係過分神秘，古怪行徑令到玩家摸不著頭腦，就算爆埋機都唔知佢係度做乜。(之後有付費DLC對呢個角色有更深刻嘅描寫，但係個人認為呢啲描寫好應該係係本篇遊戲入面出現)再加上佢唔突出嘅外形，完全唔似係一個終極頭目。
 |
| 艾汀嘅外觀冇乜特色，後期佢每次出場都令玩家進入「WTF」狀態 |
無可挑剔嘅神級畫質
作為3A級大作，畫面質素靚就梗。除左人物表現靚之外，風景都係一絕。係主角探險期間會出現好多山明水秀嘅風景，又會到訪唔同城市，呢啲景物嘅表現完全係真嘅一樣，唔講以為自己係睇緊高清相片。
 |
| 呢個係遊戲畫面，睇睇下會以為係威尼斯嘅相 |
另外戰鬥畫面都係非常華麗，主角便用幻影劍嘅特效，同埋驚天地泣鬼神嘅召喚獸特效震撼到好似睇緊3D電影咁。
 |
| 每個召喚獸出場特效都好精彩，在下就最鐘意睇濕婆出場(喂﹗) |
流暢爽快嘅戰鬥體驗
有別於以往嘅Final Fantasy嘅回合制玩法，今集XV由RPG一躍成為ARPG，由悶到爆等行動量表出招嘅戰鬥玩法變成無縫戰鬥。以往嘅行動量表玩法就有繼續留低，但係就變為出魔法或者呼叫同伴出招嘅招令，將新舊玩法融合成為一個好有趣嘅戰鬥模式，新舊玩家都玩都咁高興，好似在下呢啲覺得回合制悶到爆嘅玩家就覺得呢種模式非常爽快，加上上面提到流暢嘅戰鬥畫面，真係一個唔錯嘅戰鬥體驗。
 |
| 玩到後面可以一招打天下 |
但係戰鬥去到後期開始見真章，敵人對應方法千篇一律同埋主角迴避太過易按(長按正方角色就可以自動迴避)，魔法同好多招式嘅存在感都好低。同埋Final Fantasy嘅敵人大多出名厚血，打多幾次就會開始乏味，基本上就係長按迴避，一直用諾克堤斯嘅絕技「變移斬」打到尾。
四個小生去旅行嘅體驗
遊戲初段其實真係關於四個大男孩去旅行，呢部分亦係在下最歡喜嘅部分。人大左之後，想再約一班朋友去個旅行就係好難，就算約到都可能突破有武漢肺炎搞到要Stay Home冇得去。遊戲初段就令在下搵番呢種年少輕狂嘅感覺，可以揸車播住歌係公路上面兜風，係自由嘅感覺呀﹗
 |
| 雖然話可以自動駕駛，但係都只可以留係公路上面 |
 |
| 揸車揸到悶騎下陸行鳥都幾好 |
 |
| 甚至可以好奔放咁係個大草原上面跑 |
除左可以同幾個老友四周圍探險尋寶打下怪，佢地四個仲有各自嘅興趣，例如諾克堤斯鐘意釣魚、
伊格尼斯鐘意煮野食、普羅恩普特同鐘意攝影，玩家可以係遊戲期間進行呢啲活動，之後佢地每晚都會同大家分享自己嘅成果，能力仲會慢慢提升，好過癮。
 |
| 釣魚都好講技巧，釣番黎嘅魚可以交俾伊格尼斯當食材使用 |
 |
| 食物畫面好似真一樣，想拎起相機等相機食先 |
 |
| 入黑咪幾丁友起個營，圍爐取下暖囉 |
爆機之後，地圖上面會出現好多隱藏要素，仲有好多難高超高嘅迷宮等住玩家探險，二周目嘅耐玩度超高呀。
差勁嘅說故事技巧同馬虎嘅收尾
呢個遊戲最可惜嘅地方就係好多地方太輕描淡寫(再重申一次，呢啲野應該係本篇遊戲就要做好，唔應該係付費DLC入面)，好多劇情上嘅呈現都唔夠深入，浪費左性格刻劃得咁鮮明嘅人物設定。劇情發展到諾克堤斯去水都同露娜會合之後就開始發生故障。露娜出現左冇幾耐就死左，在下覺得非常突兀。露娜呢個角色只係係諾克堤斯嘅記憶入面出現過短短幾幕，實際上同玩家冇乜交流過，寫劇本果位老友以露娜嘅死推進劇情，仲刻意營造好悲壯嘅效果，但係玩家其實冇乜感覺。如果劇本可以安排多啲露娜同主角們嘅經歷，相信露娜嘅
犧牲會令玩家更有感覺。
 |
| 突然將露娜賜死白白浪費左一個角色 |
露娜死左之後，遊戲就突然變左線性通關。根據劇情發展冇左開放式探險係好合理嘅，但係接住落黎嘅劇情輕描淡寫，推進快到冇朋友，好多應有嘅神節都冇描寫到。例如瑞布斯嘅故事可以描寫得更好，大反派艾汀神神化化嘅行為又令玩家R哂頭，好多野冇講清楚輕輕帶過，在下嘅體驗好似佢地趕住收工咁樣。
另外對於主角諾克堤斯嘅心境轉變可以描寫得更細膩。諾克堤斯由一個玩世不恭嘅MK仔，變為頹敗不堪嘅廢柴，之後重新振作，劇本可以著墨多啲主角係呢幾個唔同狀態嘅轉變，等玩家可以同主角一同經歷成長。
雖然後段一大堆馬虎嘅劇情將故事推進至尾聲，但係結局嘅處理在下認為幾有味道。故事結尾諾克堤斯似乎犧牲左自己黎殺死艾汀，而最後拉完Credit之後就出現諾克堤斯同露娜一齊睇相片嘅甜蜜片段，留低一個幻想嘅空間比各位玩家。
 |
| 究竟所以野都係幻象定呢個係一個平行時空，呢層等各位玩家自行幻想啦 |
題外話:最後拉Credit嘅時候播放住名曲Stand By Me，同埋放映住係旅程入面普羅恩普特所影嘅相，配合諾克堤斯嘅死，真係超Feel。
總結
呢款係一款俾馬虎劇情摧毀左嘅好遊戲。要留意，係馬虎，而唔係短。太多應該描寫嘅野冇描寫仲要放呢啲野係付費DLC度掠水，真係令在下好不滿。如果佢開章名義講呢個遊戲係分成幾集嘅，在下絕對冇咁嬲。但係佢咁樣做一個唔完整嘅遊戲再出DLC就擺明係呃錢，所以總括黎講我會俾負評呢個遊戲。
最後再提一提大家，最多四個。
留言
張貼留言