2020年係一個遊戲大年，好多好值得期待嘅遊戲都會係今年推出，一大堆系列續作或者重製版都排住隊都上架；仲有幾日就出嘅《Resident Evil 3 Remake》、等到頸都長嘅《Final Fantasy VII Remake》同埋《The Last of Us part II》經已佔據小弟嘅購買清單。雖然在下係海賊王鐵粉，但總不能日日夜夜淨係打機嘅，係呢一波瘋狂嘅遊戲攻勢下，唯有忍痛暫時放棄係3月26號上市嘅《海賊無雙4》，等下一次遊戲荒先再考慮入手啦。
即使冇入手《海賊無雙4》，見到網上面好多其他玩家分享嘅破關影片，都不禁少少懷念起之前玩過嘅對上集《海賊無雙3》。藉住呢個Throwback Thursday，小弟就別開生面分享一下。
在下一直都對無雙遊戲極度無感，從來都冇了解過遊戲點玩，一直只係認為無雙遊戲只係無腦喪禁，浪費指力。除左《海賊無雙3》之外，小弟從來都冇掂過其他任何一款無雙遊戲。之不過咁，如果可以使用自己鍾意嘅角色一騎當千、以一敵百，都咪話唔爽。於是在下就買左暫時人生唯一一款無雙遊戲，更顛覆左一直對無雙遊戲嘅睇法。
 |
| 快啲上船啦，我地要開始啦 |
劇情
《海賊無雙3》入面嘅劇情覆蓋左大部分海賊王嘅正傳劇情，由路飛幫索隆拎番三把刀之後組成海賊團作為序幕，劇情一直殺到去龐克哈薩島，都係跟足原著劇情。而德雷斯羅薩篇嘅後段就係原創故事，相信係因為係遊戲製作嘅時候呢個篇章嘅漫畫都仲未出完。(德雷斯羅薩篇以現實時間黎計，日本每星期播一集，足足播左三年幾)劇情節奏明快，用黎回顧一下咁多年嘅劇情係唔錯嘅，好多經典場面都可以再睇番。但係如果想透過呢個遊戲入海賊王坑就差啲啦。始終篇幅關係，好多包含重要資訊嘅文戲都冇提及。以下分享幾個經典畫面。
呢啲經典場面有啲就以過場動畫呈現，有啲就以漫畫風格，配上聲優原聲演出，感觀一流呀，對Fans黎講好多場面都係滿滿嘅感動呀。除左呢啲重大場面之外，有一啲故事小枝節劇情或者一啲特別嘅對話就需要達成一定嘅條件先會出現，因為想睇哂完整嘅劇情就可能需要將關卡用唔同角色通關，除左增加左遊戲性，仲可以從其他角色嘅角度去睇個故事。
 |
| 所謂海納百川有容奶大，娜美廣闊胸襟原諒魚人係在下喜歡娜美嘅其中一個原因。呢一幕要達成特別條件先會出現嫁 |
戰鬥系統
無雙遊戲嘅賣點就係爽快簡單，所以角色使用嘅操作係非常簡單。在下玩嘅係Switch
版，幾乎出任何招都係X同Y唔同嘅組合，非常簡單。話雖如此，其實遊戲嘅難易度並唔係取決於遊戲內建嘅難易度，而係取決於玩家揀嘅角色。由於令個角色出嘅招式威力同效果都唔同，例如在下嘅最愛-娜美-就係屬於技巧型嘅角色，如果亂衝亂撞隨時俾人辣手摧花。但係只要了解好娜美嘅能力同將佢嘅招式應用得宜，就可以打出超強嘅傷害啦。
相反，有一啲角色的確係可以用無腦嘅打法，基本上亂咁打都會贏，例子有艾尼路、白鬍子、籐虎等等，佢地嘅強大亦都好符合佢地嘅人物設定。
其中要提一下嘅就係夥伴戰鬥系統。同伴係海賊王嘅其中一個大主題，戰鬥絕對唔係單打獨鬥嘅。係劇情或者其他模式入面都會遇到同伴，而同伴就會係戰鬥入面助玩家一臂之力，儲滿一定量表仲可以出強力嘅組合必殺技。夥伴除左可以幫助過關之外，仲係過關嘅評分標準之一，想以高評價過關就一定唔可以吝嗇夥伴嘅能力。
戰鬥畫面
遊戲入面嘅畫面非常之靚，尤其係角色出招時候嘅動畫，將動畫入面嘅2D招式特效以3D重現絕對係賞心悅目。呢部分講多無謂，分享少少圖片啦。
夥伴技能海報及稀有硬幣
呢兩個項目本來冇乜關係，但係都係在下比較唔喜歡嘅地方，所以放埋一齊講。夥伴技能海報其實係講緊每個角色都可以解鎖佢嘅專屬技能放係其他角色身上，例如娜美嘅技能「航海士的心得」係可以提高閃避連招嘅銜接，當娜美夥伴等級升到一定程度之後就可以解鎖以套用係所有角色身上。而呢個系統嘅其中一個設計就係某一啲角色嘅技能要先解鎖另一個角色嘅技能，而呢個角色又有機會需要解鎖另一個角色嘅技能。例如我想解鎖薩波嘅技能要首先解鎖路基嘅技能，而解鎖路基嘅技能又要先解鎖貝拉密嘅技能。係唔係聽落都覺得煩呢?最慘呢三個角色都唔係主線劇情可用嘅角色，要練真係練到天荒地老。
另外就係要講下呢個硬幣系統，每個角色都需要用一啲硬幣去解放一啲能力，除左基本能力值提升，仲有機會係新嘅招式或者解放等級上限。有一小部分嘅硬幣係有好明確嘅指引去講點樣去拎。但係有超大部分嘅硬幣竟然係打關卡嘅時候隨機得到。大佬，我如果唔好彩咪打一世都打唔到…
夢幻冒險模式
除左打劇情之外，絕大部分時間玩家都會係呢個夢幻冒險模式入面玩。呢個夢幻冒險模式係俾玩家去拎一啲係劇情上面唔可以操控嘅角色。例如白鬍子必須要透過夢幻冒險模式解鎖。而且上面提過嘅稀有硬幣絕大部分都要玩夢幻冒險模式先有機會得到。玩呢個模式嘅目的就好多啦，但係有冇佢當中嘅樂趣呢?老實講，其實只有初初係有啲趣味。呢個模式入面會有好多好有趣嘅對決，例如男對女、科學能力對果實能力、劍士對赤手空拳，當中又會出現一啲好有趣嘅對決或者組合，佢地就會有一啲特別嘅對話，都會令海賊迷會心一笑。可惜，玩落去之後其實都係不斷咁打打打，重覆性太強，所以在下最後一塊拚圖打打下都再冇心機打落去。
總結
作為一款Fans向遊戲，《海賊無雙3》大約係75/100啦。係經典場面同埋一啲戰鬥招式重現就已經拎足分嫁啦，但係係培養角色方面嘅設計就比較肝啦，角色對應嘅升級材料竟然仲以隨機形式出現，真係玩死人，所以呢個部分扣左少少分。
留言
張貼留言