暌違六年嘅《The Last Of Us Part II》終於推出左，我諗大部分買左呢個遊戲嘅玩家都已經玩完整個遊戲，又或者已經放棄左去完成呢個遊戲。
在下身為《The Last Of Us》(下稱一代)嘅忠實Fans，二話不說就訂左貴一貴嘅典藏版。就算日子再難過，都會同自己講「要撐過去，好快就可以玩到《The Last Of Us Part II》嫁啦！」。之後廠方將推出日子一延再一延，在下又一等再等，跟住又出現劇透事件，在下都一於唔理繼續日盼夜盼。終於終於係上個星期收到遊戲…果然世界完全不像我預期，估唔到Naughty Dog竟然為我呈上一篤屎。
面對呢篤屎，心情真係差到極點，甚至可以話係崩潰。但係買左咁大箱野係屋企篤眼篤鼻，冇辦法逃避，始終都要面對佢。今日在下就真真正正同呢個遊戲黎一個了斷，而且希望可以有更多人睇到我呢一番說話，唔好比呢一款遊戲摧毀大家已經殘破不堪嘅2020年。
在下將最具爭議性嘅劇情放到最尾先講，先從其他方面去講一講個遊戲。
神級視覺效果及音效
《The Last Of Us Part II》作為PS4時代最後一波嘅3A大作，遊戲畫面可以話係將PS4嘅性能用盡。遊戲一開場就近鏡拍攝緊一代主角喬爾抹結他，畫面仔細到可以清楚睇到喬爾手指上面嘅每一條細紋。接續出現嘅草原，傑克森市嘅面貌，畫面細膩度同光線捕捉等等可以話係無可挑剔，真正係嘆為觀止。
 |
| 仔細到手指嘅細紋都好清楚 |
 |
| 畫面靚到冇辦法挑剔 |
之後隨住故事進度會出現更加多嘅場景，比起一代會展示更多經歷末世摧殘嘅建築物，例如圖書館、電視台、水族館等等，呢啲場景嘅布置同細節部分都係一絲不苟，可以感受製作團隊係呢啲場景上面花嘅心血。除左場景之外，人物嘅表現都係非常出眾。各種人面上嘅表情，小動作等等都好到位。
另外係音效方面都係一個感到用心嘅地方。配樂風格沿用一代憂怨嘅結他聲，好對題。而今集戰鬥時候嘅音樂就比上集強化左，更加有緊張嘅感覺。
遊戲性高度強化
今集嘅遊戲性就比一代強化左幾個層次，除左一代關於資源管理嘅部分繼續優良地傳承，人類敵人AI更加聰明，會互相溝通作出包夾等等戰術，令到遊戲性大增。而佢地面對同伴死亡或者玩家身影嘅時候更加貼近真實，唔好突然好似裝左GPS咁，等玩家可以使用更多唔同嘅戰術。新敵人會帶領狗隻用味覺找尋匿藏嘅玩家。其實呢個元素係另一個潛行遊戲《Styx : Master of Shadow》都出現過，出現另個元素更加考驗玩家嘅機動性，唔可以一味守株待兔，更加真實。
場景複雜性嘅進化亦都係今集遊戲性嘅重點要素。今集嘅戰鬥環境比起一代更廣更闊，配置更複雜，等玩家可以穿梭唔同嘅地方，保持機動性。更廣更闊嘅場景換來嘅係更多嘅敵人，可玩性更強。
 |
| 在下認為呢場搶船戰鬥係全個game最好玩 |
人類敵人AI強化左，感染者又點呢? 今集感染者方面除左出現新型敵人跛行者之外，上集戲分極少嘅潛行者今集就爭取到更多嘅出場機會。潛行者雖然唔算好強大，但係主角聽唔到佢地嘅聲音，佢地又鍾意同主角玩捉迷藏，總係從意想不到嘅地方偷襲玩家，而佢地出現嘅地方總係又陰森又恐怖，在下就覺得幾場同潛行者嘅戰鬥比起對付強大嘅感染者更加有趣好玩。
終於黎到最具爭議性嘅劇情部分。事先聲明，在下認為呢款遊戲絕對唔值得買或者哂時間玩，如果你依然有興趣去玩嘅話，就小心注意以下內容含有嚴重劇透。⚠
------------------------------------------------------------------------
------------------------------------------------------------------------
------------------------------------------------------------------------
屎一般嘅劇情
在下以前嘅評論都有提過劇情對一個遊戲係好重要，尤其係《The Last Of Us》呢種故事主導嘅故事，係好雖要玩家嘅代入感去玩。我要殺人或者殺喪屍大把遊戲做得更好，點解《The Last Of Us》可以咁成功? 因為佢勾劃出一個簡單但係動人嘅故事，設身處地角色嘅感受，令到玩家有代人感，清楚自己點解要戰鬥，點解要殺死前面嘅敵人。角色所做嘅係各種人性化嘅行為，看似瘋狂但的確係人嘅所為。喬爾同結伴一年嘅艾莉產生父女之間嘅感情，最終係世界同女兒之間佢選擇左女兒，故事流暢，邏輯冇出錯，符合角色設定。遊戲性等等優秀嘅設定就變為推進劇情嘅工具。
而第二集竟然係反其道而行，宣傳嘅時候已經不斷強調佢嘅遊戲性。遊戲性反而成為重點，劇情人物變左襯托遊戲性嘅工具。最終劇情變成一堆完全冇邏輯、前戲唔接後戲嘅橋段拼湊埋一齊，在下會直稱佢為一篤屎，將團隊製作畫面音效同遊戲性能嘅心血白費哂。係在下更深入解釋點解在下會認為係一篤屎之前，首先要數一數Naughty Dog(副總裁?)嘅兩個罪狀。
罪狀1: 宣傳片大騙局，惡意消費一代玩家
先睇一睇呢位網友將所有官方Trailer集合哂一齊嘅片段。
可以見到幾乎嘅片段都係艾莉嘅劇情，而且仲透過神奇嘅剪接誤導玩家喬爾會再同艾莉並肩作戰。甚至後期再釋出Gameplay部分都只有艾莉嘅出現。有幾多一代嘅玩家都係因為艾莉同喬爾而狗衝呢個遊戲。而最後出黎嘅係咩野，喬爾係序章就已經比人用高爾夫球桿虐打至死，艾莉係可以操控，但只有半隻Game嘅戲分，另外半隻遊戲係要操控另一個新角色艾比。呢個安排有幾噁心陣間再講，但係呢個就好明顯係惡意消費一代玩家對舊角色嘅情意結。正如一套戲戲名叫《蝙蝠俠與羅賓2》，Trailer入面都係蝙蝠俠同羅賓，但係入到戲院蝙蝠俠一開場就死左，之後有半套戲係講緊企鵝人，咁樣OK嗎? (其實呢個比喻經已美化左件事)
罪狀2: 試圖以LGBT做擋箭牌，掩飾劇本差勁事實
遊戲推出前出現劇透風波，唔少玩家見到咁差勁嘅劇情引起好劇烈嘅爭論，而遊戲入面亦涉及大量LGBT(LGBT是女同性戀者、男同性戀者、雙性戀者與跨性別者的英文首字母縮略字，一般和性少數者同義) 嘅要素，遊戲總監兼有負責劇本嘅Neil Druckmann就大鬧呢啲唔中意故事嘅人就LGBT歧視者。去到遊戲推出之後，佢嘅態度依然故我，繼續以聖人自居，唔鐘意劇情只係你地對LGBT嘅歧視。在下認為呢啲左膠元素的確係過左火，但劇情本身真係非常之有問題，Neil Druckmann咁樣用LGBT做擋箭牌真係極度賤格。
敗筆1: 精神錯亂嘅安排，刻意替新角艾比洗白，將舊角艾莉妖魔化
岩岩提到有半個遊戲係要使用一個新角色艾比，點解當時我話呢個係一個噁心嘅安排呢? 因為佢就係亂棍打死喬爾嘅主兇。當時劇情係操控艾莉出發係傑克森市附近巡邏，之後突然角色切換成艾比，一堆冇頭冇腦嘅對話之後又唔知點解咁不斷前行，去到最後先發現佢係想前行去殺喬爾。連接罪狀1，有好多玩家都係衝著對喬爾或者艾莉嘅情意結黎進行個遊戲，之後竟然安排玩家親自操控一個角色虐殺自己喜愛嘅角色，究竟精神有幾錯亂先諗到呢個安排?
好啦，喬爾死左啦，終於操控艾莉去復仇啦。用艾莉一路殺殺殺，中間穿插一啲過去艾莉同喬爾嘅回憶片段，挑起玩家嘅懷念同痛恨，跟住艾比突然殺上門一槍射死艾莉嘅同伴，突然又開始操控艾比去了解佢心路歷程。先唔評論艾比呢個角色造型有幾唔討好，呢一刻玩家嘅仇恨值爆哂燈，無啦啦叫我去了解佢嘅心路歷程，係唔係神經錯亂呢? 邊個想知?
 |
| 竟然要操控艾比攻擊艾莉，究竟係邊個天才諗出黎? |
最慘係劇情刻意幫艾比洗白，例如會講艾比殺喬爾嘅原因，各種好人好事，但係唔好意思，冇人想知。兼且仲要惡意地將艾莉妖魔化，例如艾莉殺過嘅狗會係玩家面前搖尾討玩玩，又會強調艾莉殺左一個大肚婆，試圖去將艾莉寫到係破壞王咁，相反艾比殺喬爾好應該，其實佢係一個好人，見到呢啲情節真係好噁心。
 |
| 「連咁可愛嘅狗狗都殺，真係冇人性」 |
另外想講一講嘅就係關於唔鍾意艾比外型呢個話題，有啲人會覺得係歧視。在下覺得咁樣諗嘅朋友要搞清楚，同LGBT同理，我認同同性戀應該享有尊重、平等對待或者各種權利，但係唔代表你可以逼我搞Gay。我個人唔喜歡操控好似艾比呢種角色我會選擇唔玩，但係由於以上提到宣傳上嘅惡意隱瞞令到我好似被逼就範咁，所以在下覺得好反感。
如果仲係覺得在下係對一啲外觀唔討好嘅角色有偏見，我會介紹一個角色俾大家識。《Horizon Zero Dawn》入面嘅主角Aloy係在下認為相貌唔討好(或者有人唔認同)，身型又好粗獷，但係在下完全唔反感，反而仲有啲得人喜歡，成個遊戲玩得非常開心。所以玩家對一個角色反感到底問題係出係邊呢?
 |
| 個人認為Aloy外型唔討好，但人設吸引 |
敗筆2: 故事舖排混亂，人設混亂，亂亂亂亂亂
不得不承認，遊戲入面有幾幕係幾動人，例如喬爾艾莉各自自彈自唱嘅橋段、艾莉生日參觀博物館呢個情節係幾動人，但係只係限於獨立咁睇呢啲情節。當呢啲情節串連番個故事度，就會完全唔明編劇想表達啲乜野。插敍倒敍呢啲手法係講故事嘅時候經常會用到，劇情上無論艾莉定係艾比都會不時穿插一啲回憶片段，問題係呢啲回憶片段在下搵唔到同實時發生嘅事有咩野聯繫，好似得閒醒起又回憶下，坐低諗到又回憶下，搵唔到連貫性，對劇情推進又冇幫助，亂到無倫，好阻礙玩家去投入角色。例如話，究竟艾莉係喬爾死之前有冇原諒到喬爾? 呢一點好影響玩家嘅心態同投入感(有遺憾同冇遺憾差好遠)。透過遊戲初段嘅對話，好似係原諒左，但係透過回憶片段又好似冷戰緊，去到最尾發現喬爾原來未必原諒，請問係如何代入角色。連艾莉又處理得咁差更何況係殺父仇人艾比呢。
再者，呢個故事好有趣，有別於一般故事隨住劇情推進角色性格改變，呢個遊戲係角色性格突然改變而推進劇情，同埋角色行為完全唔合邏輯。最明顯莫過於艾比，一開始殘暴咁殺害喬爾，更加被稱為WLF頂級殺手，殺殘疤完全唔手軟，之後遇到列夫同葉拉突然聖母上身，為左佢地違反軍令，最後仲反殺自己隊友。朋友全部被殺好嬲，所以找艾莉晦氣，一槍爆頭冇殺過佢老友嘅傑西，反而放過左殺死佢朋友嘅兇手，可唔可以解釋下佢個腦諗緊乜野。
之後嘅劇情更離譜。經歷西雅圖嘅事情之後，雖然殺唔到艾比，但係艾莉同狄娜都放下仇恨過住一啲遠離煩囂嘅生活，艾莉有創傷後遺症，但係係狄娜協助下努力剋服，事情總係冇完美，咁樣都係一個唔錯嘅結局。如果劇情黎到呢度就完結在下都會比番一個合格嘅分數呢個故事。
 |
| 如果故事黎到呢度就完，個人認為都可以合格 |
呢個時候長輩級人馬湯米突然性情大變，本身係一個保護後輩嘅人物，無啦啦情緒勒索艾莉想推佢出去死。為左將劇情推進，直接將湯米嘅人設摧毀，艾莉又會真係拋棄家庭再出發去復仇，編劇果條友係唔係對左草? 沒有最離譜，只有更離譜，跟住落黎結局部分先黎料。
 |
| 唔知點推進劇情? 摧毀人設就冇問題啦。 |
敗筆3: 不知所謂嘅結局
艾莉放棄家庭遠走聖塔芭芭拉，再次搵艾比復仇。呢個時候艾莉突然變左個殺人成性嘅人，遊戲過程要玩家通過當地幫派嘅據點，如果玩家冇辦法潛行要殺人嘅時候。艾莉就會好興奮咁喃喃自語「下一個。下一個。」點解突然有個咁嘅轉變，故事冇交代，之後艾莉終於見到佢眾叛親離都要搵嘅仇人艾比比人綁住左，佢竟然選擇將個仇人放走。跟住又突然諗起要復仇，要脅艾比同佢對打。過程非常慘痛，艾莉俾艾比咬斷左兩隻手指(對一個有彈結他嘅講真係好心酸)，但係成功壓制艾比，最後一擊要了結嘅時候突然諗起喬爾，佢又選擇放走艾比。以上呢段劇情完全係超越人類思考邏輯，在下搵左一個IQ 160嘅朋友嘗試一同了解究竟發生咩野事都搞唔清楚做緊啲咩野，有冇天才可以解釋下?
OK，劇情真係咁樣發生啦，究竟呢個結局想帶出啲咩野? 艾莉最終放棄復仇，終止呢場復仇嘅輪迴? 或者好似艾莉嘅演員Ashley咁講艾莉係人性嘅光茫? 先唔講呢個Topic有冇深度，睇一睇之前嘅故事，艾比兩次心軟放走艾莉，所以復仇戲碼一直上演、艾莉放棄復仇最後一無所有。所以我想再問一次，究竟呢個結局係想帶出啲乜野。
 |
| 艾莉最終一無所有 |
敗筆4: 過火嘅政治正確
黎到最後就係政治正確呢樣野。上面都提過，我認同同性戀唔等於可以逼我搞Gay。呢個遊戲就係逼我睇一堆過火嘅政治正確嘅劇情，成個遊戲就係渲揚女人就係最強，男人根本冇用，可以留意下有幾多個男角色變左路人無啦啦被人爆頭，臨死都冇句遺言。例如傑西呢個角色有好好嘅人設但就無啦啦俾人爆頭，浪費哂。最心寒就係有一段要睇住個大肚婆係度爬高爬低跳來跳去幫我開路，真係覺得好噁心。
最大問題係，Neil呢個左膠似乎唔係好明點樣為呢部分嘅人平權。為LGBT、女性、黑人平權係要為佢地爭取同其他人平等嘅尊重同權利，刻意將佢地打造成超級英雄係冇意思，搞到變左黑人就係最勁，白人就係廢，個概念完全係廢。再加上佢咁樣強行將人地放係聚光燈之下有冇問過人地意願先，其實只係斷章取義，借人地黎過橋黎將自己嘅個人理念呈現出黎，某程度上算係一種冒犯。完全唔明白點解Neil仲可以一副聖人mode咁覺得自己好偉大。
就當佢真係想平權，咁故事出現侮辱亞洲人嘅事又點解釋呢? 本來呢幾句台詞係其他遊戲黎講只係普通嘅對白，不過係一部咁「政治正確」嘅作品入面，呢句野似乎不懷好意wor。
 |
| 涉及侮蔑亞洲人部分 |
以上提到嘅野就係在下認為呢部作品可以稱為屎嘅原因。不過有啲人會認為末日世界就係咁殘酷，咩野都有可能發生嫁啦，所以無論故事點寫都係合理。咁想問番呢啲人，你平時番工放工番屋企，第二日又番工放工都好合理，你覺得呢個係唔係一個好故事? 如果係不如出本小說。
一路打一路好嬲，最後我只係想問編劇一個問題。
Dear 編劇,
留言
張貼留言