"開箱" One Piece Film Z Figuarts Zero - Part 1

好耐都冇開箱啦，因為在下嘅工作壓力同居住嘅地方發生左一連串令人不安嘅事情(其實一直都有)，連玩玩具嘅心情都冇呀😖。不過咁，總要搵啲野治療番自己嘅心靈嘅，對在下黎講開Figure就係最舒壓嫁啦😚。繼早前開左一套6隻嘅FDS Code:B系列，今次繼續係大堆頭系列，就係One Piece 電影 Film Z (Film Z係2012年嘅電影) 嘅全套Figure，總共有15隻，在下就收左當中嘅13隻(路飛同喬巴各自都有兩款，在下都只係要左其中一款)，在下會分成4Part黎Post。

係Film Z入面，主角們最後換上一身中歐風格嘅戰鬥服去決戰，非常有型同有特色，在下非常之鐘意，係網上搵到二手全套黎收藏。呢一套Figure係極度搶手，原因係只有Figurats Zero有出齊哂整個草帽團，極有收藏價值。而其他人氣系列例如DXF，P.O.P.都有推出Film Z造型嘅Figure，但係可惜連主角團隊嘅人物都冇出齊，玩死一班有收集癖嘅朋友。

當時收到貨嘅狀況就好似上圖咁樣 (和之國羅係唔關事嘅，幾個月前已經開左啦)，做足哂保護包左好多波波紙。賣家就話布魯克有斷椿所以會平賣，到時再睇下咩野環境。我地先由反派/配角開始開啦！

艾恩

電影原創人物。呢位橫空降生嘅靚女係Neo海軍嘅成員，係一名女劍豪。佢最特別嘅地方就係佢擁有倒退果實能力，可以將手掂到嘅人或者死物倒退12年。係第一次同草帽團交鋒嘅時候佔盡上風，娜美、喬巴、羅賓同布魯克都中左招倒退左12歲。

全部內容物，有一把刀仔，非常容易唔見。

正面同背面，一雙大長腿非常吸睛。個人認為披風配色太淺，感覺好膠。

面相還原度極度不行，不禁要問句「小姐你邊位?」。再加上面色蒼白，好似病壞。

服裝細緻度算係OK，花邊都做得精細。披風似乎可以拆落黎，但在下搵唔到拆嘅方法。

美腿雖然吸睛，但係再仔細睇會發現下盤位置嘅線條其實做唔好。(其實整個系列嘅女性角色都做得唔好，羅賓係最明顯，容後再談)

澤法

電影原創人物。原海軍大將，當時嘅海軍三大將都係佢嘅門生。係其中一次帶領實習嘅時候被海賊襲擊而痛失大量學生同埋自己嘅右臂(艾恩係事件入面嘅倖存者)。得知斬斷佢手臂嘅海賊成為王下七武海(簡單黎講就係世界政府認可攞正牌嘅海賊)而走火入魔，成立以殲滅所有海賊為目標嘅NEO海軍，同時與海賊同海軍為敵。機械手臂係同海樓石打造。

所有內容物，極重裝備。

正面同背面，霸氣外露。

面相冇挑剔，就是型。但係額頭果幾條皺紋可以劃得認真少少。

服裝做足料，各部分都做得唔錯。披風特別地係用一粒釘釘住。

機械手非常搶fo，設計成可動。

庫山(青雉)

呢個動畫本篇都係有好多戲分嘅男人，有睇開嘅都會識佢嫁啦。原海軍大將，頂上戰爭之後同赤犬決鬥爭奪元帥之位，落敗之後退出海軍。傳聞佢會倒戈成為海賊。係冰凍果實能力者。

附有一個超級突兀嘅輔助座。

高大威猛，都係非常有型。

面相冇乜特別，100%還原。

下半身皮褲感覺個人認為非常正。

手上透明酒樽好真實。

下次就開始開主角們啦。