【電影】感動90後小朋友的小朋友 － 數碼暴龍大電影 last evolution 絆

唔知大家細細個果陣有無睇開咩卡通長大呢？有人可能係睇20年前10歲嘅小智係真新鎮出發，到宜家現年10歲嘅小智嘅寵物小精靈。

有人係睇三個戴住頭巾，烏龍百出嘅忍者亂太郎。

有人睇好熱血，「我想打籃球」嘅男兒當入樽

當然都有啲女仔會睇玩晒古羅卡嘅「百變小櫻Magic card」

身為90後男仔，有一套必然要睇嘅，就一定係8個被選中嘅小朋友「數碼暴龍」。1999年播出嘅數碼暴龍得到好大迴響，細個果陣就當你無愛上戰鬥暴龍獸第一次嘅究極進化

巴達獸進化天使獸，用天堂之拳同惡魔獸同歸於盡

又或者係兩大究極體自相殘殺嘅悲壯場面

都一定有以下幾幕最大嘅回憶（你懂的）

每個鐘意睇數碼暴龍嘅小朋友，都應該有佢最鐘意嘅角色。隊長就最鐘意代表友情嘅鋼鐵加魯魯同大和，又有型又有義氣。之後數碼暴龍有出02，03，呢兩套隊長都有睇過，不過果種親切感就大不如前，更唔好講之後嘅04 05 06等等，實在係垃圾到唔垃圾（大門大獸都夠膽死作出黎，你話笑死唔笑死，唔知咩係大門大獸就自己search下啦）正當以為數碼暴龍一蟹不如一蟹，以為一代回憶就咁消失，呢套戲就上畫，叫做比番一個回憶比我地呢班由細陪住呢8個小朋友冒險回味一下。

先唔好講咁多，睇一睇個trailer，如果閣下係無任何感動，回憶或者勾起唔到你嘅漣漪嘅話，You may leave now。

一班已經長大嘅小朋友，一首又一首耳熟能詳嘅音樂，甚至阿古獸果把拆得黎又好鬼討厭嘅聲，不斷係度問緊我地「老朋友，你仲記得我地嗎？」太一，我地又點可能會忘記你？記得細細過放學番到屋企，即刻開電視追黎睇，打低一個又一個嘅敵人，經歷失敗，尋找自我，突破，然後新嘅進化。睇住佢地成長，我地都成長左。

細個以為吸血魔獸好難打？有天女獸出黎射死佢。以為小丑皇好霸道？絕望之際都會有神聖天使獸打開天國之門收伏佢。睇下宜家呢個社會，我地面對嘅，無皇牌飛刀，無暗黑死靈球，但係偏偏我地就係對付唔到，無阿古獸，無天使獸，無高石猛，無「希望」。

呢套戲再帶出一樣野，一啲細個你需要嘅，都大個左可能你未必再咁需要，呢啲野可能就會靜悄悄咁消失左，之係好老土果句，「失去左先黎後悔，太遲啦」。長大之後，可能有好多野定左位，仲會唔會，又或者係問，願唔願意去搵番細個果陣天馬行空，無受拘束嘅可能性呢？

就當你睇一套戲，你唔想諗你同太一佢地有咩共同點，有咩話到比你知嘅大道理，都可以回味下兒時嘅回憶。尤其今次嘅音樂，係base on舊嘅音樂編曲，比人嘅感覺又係另一種滋味。

舊版butter-fly

last evolution 版 butter-fly

舊版braveheart

last evolution版braveheart

劇情我唔會劇透，只會透下一啲minor位，一啲會令你喊回黎嘅位，包括大和嘅口琴，進化嘅畫面，仲有好多講左就會劇透嘅細位，啲眼淚要沖出黎啦。

有朋友同隊長講，佢完場後真係喊左，而隔離有女觀眾恥笑佢。隊長覺得，呢條女，更值得恥笑，因為佢無童年，無回憶，只係當一套卡通片咁欣賞呢套戲。有回憶嘅，眼淚係會出黎，喊，並唔出奇。事實係，隊長睇果場，基本上都係成年人。而完場時，大家都默然無語，睇黎會入場睇嘅，都係有過去嘅人。

隊長希望，呢套唔係數碼暴龍01嘅終結，唔希望係last evolution，願回憶與我們常在。

我係隊長，下次再同大家講電影。