作詞：林日曦
作曲：鄧智偉
編曲：葉澍暉
監製：鄧智偉
耿耿於上次太絕情 殘留全是冷漠佈景
糾結故事極難忘 難忘愛你但我沒承認
都只因上次太忘形 誰人才重要未看清
應有對白被遺忘 遺忘半句道歉沒說清
若是幸運地展開續集 讓我學會把握
日夜背誦陌生的獨白 讓態度也掌握
只要可跟你再遇見 傷過的會珍惜每刻
從頭開始 多多一次靠你我來重演
多多一集上集就如排練 就讓劇情緩緩改變
從頭飾演 飾演一個更信愛情人選
相戀之道上集未能完善 耗盡熱情重來一遍
仍然是我 或會倔強一點
但未會想 像上回被討厭
只想這一次愉快 能成為最主線
當呼吸是照舊無常 前行仍舊遍地雪霜
當四季尚在場時 能懷抱你是最大理想
現實是混亂間分別後 沒有力氣再走
現實是日夜只懂念舊 沒有辦法放手
只妄想跟你去避世 風再急可捉緊你手
從頭開始 多多一次靠你我來重演
多多一集上集就如排練 就讓劇情緩緩改變
從頭飾演 飾演一個更信愛情人選
相戀之道上集 未能完善耗盡熱情重來一遍
仍然是我或會倔強一點
但未會想像上回被討厭
只想這一次和你能同行到終點
忘記危殆畫面 第二次學脫險
趁機可清理 太多缺失太多的虧欠
忘記暴雨畫面 第二次望向天 總可雨過晴天
何時開始 多多一次看你我如何演
多多一部續集用來如願 命運或能完全改變
然而現況是各自各一邊
但願有天 會真的跟你結識暗戀熱戀多一遍
期盼來到這天 遺憾橋段可變
時間場地改變 唯獨人物不變
繼第一輯之後，on call口碑好，再添食一輯。好驚喜地，主題曲都係Joey唱，填詞都係林日曦。今次呢首，我覺得比上次果隻更超水準。
首先啲字依然用得好靚，好似「日夜背誦陌生的獨白」表現出主角果種忐忑，為左可以當有機會遇見嘅時候唔好講錯做錯，背誦想對對方講嘅野。一開始時嘅「耿耿」，又係用得好妙，放係歌嘅開頭，隊長就好鐘意啦。
第二點呢，相信會好似教書咁（隊長曾經讀過小小文學，不過成績太差，不值一提。）
就係歌詞入面用左好多修詞手法，有排比句，利用想同嘅字眼做開頭，有「現實是混亂間分別後 沒有力氣再走」＋「現實是日夜只懂念舊 沒有辦法放手」。當然，正常嘅排比句好少排兩句，起碼都三句起跳，但係歌詞用法上，又好難排比三次以上，所以我都會當佢係排比。除左排比，仲有頂真句，意思之係用上一句結尾嘅字，做下一句開頭嘅字，例子有「糾結故事極難忘 難忘愛你但我沒承認」（強調難忘）同埋「從頭飾演 飾演一個更信愛情人選。」
用呢啲修詞，學生時期就係比你去考試，用係音樂上，未必太多人會留意到，但係就係呢啲修詞，令到隻歌啲旋律聽落好連貫，所以修詞，學黎其他都有用架。
第三，係chord上面都有小小手腳做左。（都係果句，隊長有接觸小小音樂，但係學得唔足，所以有錯請指出，純屬分享）呢首歌我搵過啲結他譜，會寫呢隻係C#m key，咁我呢啲新手梗係夾capo4玩Am key（再重申純分享，有錯請指教。）正常嘅Am key歌應該少用E chord而用Em chord，但係係「但願有天 會真的跟你結識暗戀熱戀多一遍」呢句，係Em chord之後竟然加個E係度，果個位再配上音樂停左一下，感覺真係所有野可以重新再來一次咁，隊長個人就好鐘意呢個位，加埋個歌詞，有好幾次眼淚真係爭啲飛出黎，呢個小tricky，我覺得實在太妙啦。
而隊長覺得最正最正嘅，就係呢首歌嘅內容，真係《連續劇》嘅《續集》。先有用番《連續劇》嘅dodododo呢個小句，比人一種承繼上首歌嘅感覺。最厲害係係用詞上面，一啲小節位都有用番，例如《連續劇》入面有一句係「仍然能拖緊彼此 走絕地雪霜」同埋最尾一句「演好這一章 呼吸太無常」。係《續集》就有一句「當呼吸是照舊無常 前行仍舊遍地雪霜」，係呢啲小節位加番上首歌嘅細節，令人聽起黎，好有一種既視感。
唔知係咪隊長有過啲咁嘅類似背景，所以呢首歌，用字加上音樂上嘅編制，有啲位聽落好touch到隊長個心。就好似上一次做得真係差，比多次機會，同一個人，又會唔會真係改變到上一次嘅危殆畫面，清理到上一次嘅虧欠，雨過晴天？
隊長相信，大家嘅心底入面，應該都收埋一個人，不論係曾經交心舊朋友，定係確切相愛過嘅ex。《續集》就係勾起你對佢地嘅回憶。返番今日，你仲唔會想要一套《續集》？
最後，比大家欣賞下Joey係演唱會入面一次過演唱嘅《連續劇》同《續集》
我係隊長，下次再同大家講音樂
留言
張貼留言