"遊戲""Throwback Thursday"《The Last Of Us 最後生還者》

萬眾期待嘅《The Last Of Us Part II》終於終於要推出啦，仲有一個星期左右就可以同艾莉BB一齊展開驚險嘅復仇之旅啦，I am Ready左咁多年，終於真係有得玩啦。不過早前出現左一篇新聞就令到我呢份期待嘅心增添左少少擔心。

個幾月前《The Last Of Us Part II》有大量機密遊戲畫面、流程流出，有傳係製作團隊因為要趕工工時太長對公司黎個大報復，不過之後Sony就話調查後發現並唔係內部洩密，而係駭客所為，但係就冇否定流出內容嘅真確性。在下就冇睇太多流出嘅內容，唔小心開左就會即刻遮眼，正如準備去睇一套期待左好耐嘅電影冇理由走去睇劇透丫。但係有好多玩家睇左呢啲內容之後就有非常激烈嘅反應，仲話要退訂或者罷買。有傳係內容太過「政治正確」，引起一啲玩家不滿，製作團隊Naughty Dog副總裁仲好串咁係IG引用美國歌手Kurt Cobain嘅說話，暗示歧視同性戀嘅人唔好買咁話。但係依在下所見，呢啲激烈嘅反應唔會因為純粹因為「政治正確」呢個問題(下面會解釋)，所以令在下有啲擔心。

講左一大輪關於《Part II》嘅野，終於要入正題講今次TBT主題《The Last Of Us》。《The Last Of Us》係2013年推出嘅作品，當年係PS3上面推出就馬上風靡整個遊戲界，當年就橫掃遊戲界嘅各個大獎，未聽過就真係唔識貨。遊戲係2014以Remastered 版本登陸PS4，在下先有機會玩到，Remastered版本附贈嘅DLC《Left Behind》補充左正傳嘅劇情同主角艾莉嘅前傳故事，將整個遊戲提升一個層次，事隔六年《The Last Of Us》依然處於在下心中嘅第一位。相信好多玩家都同我一樣認為《The Last Of Us》係一款神台上嘅作品，見到心入面神作嘅續集唔係預期般咁精彩，所以先會有咁劇烈嘅反應。即刻由在下嘅角度，睇下呢個遊戲有幾神。

在下為左準備心情將呢集嘅最高難度又破左一次，係玩嘅時候Cap左啲圖，就唔洗上網啦。😂

開始前聽下主題音樂先，慢慢投入呢個絕望末日嘅世界

神級敘事技巧

在下一向係非常注重遊戲劇情嘅玩家，有一個好嘅劇情就會更容易待入遊戲角色，玩起上黎就會更投入更好玩。《The Last Of Us》故事大綱唔算太特別，背景係真菌病毒肆虐全球嘅未日環境，主角艾莉成為製作疫苗嘅關鍵，另一位主角喬爾就要護送艾莉穿洲過省，將艾莉送到反抗組織火螢嘅醫學團隊手上。本身整體故事唔算太特別，仲可以話係有啲老掉牙，但係過程穿插嘅事件同埋製作團隊講故事嘅技巧一啲都唔簡單。仲有劇情入面對角色嘅內心描寫十分細膩，尤其係兩位主角，令投入感大增，等玩家可以同兩位主角共同經歷感情嘅轉折。

例如男主角喬爾嘅過去並唔係直接同過場動畫帶過，玩家係序章可以親身體驗同女兒莎拉溫馨嘅生活，緊接就係病毒爆發逃亡嘅瞬間。逃亡期間莎拉中槍身亡，透過遊戲佈下嘅氛圍，玩家可以親身感受到喬爾喪女嘅切膚之痛，不自覺地投入角色。更加巧妙嘅係同一時間玩家已經係呢場逃亡熟習左部分操作。

遊戲序章馬上俾大家感受喪女之痛

投入角色去到遊戲，透過呢段「運送」旅程入面嘅種種經歷，大家可以見證住喬爾嘅心路轉折。喬爾一直未放下喪女呢件事，佢只係選擇避而不談，而且護送艾莉對佢黎講只係一場交易，所以遊戲初段會對艾莉有抗拒表現。到後來同艾莉經歷更多驚險場面，漸漸視艾莉為同伴，甚至將生命押上艾莉手上。之後呢種形同虛設嘅關係迎來一場爆發，一場罵戰之後先慢慢走長達二十年嘅陰霾，之後就係慢慢將對女兒嘅感情投射到艾莉身上，故事嘅結尾更加做出一個驚人嘅舉動。一個遊戲可以令人感受以上所講到咁豐富嘅情感變化，真係非常之唔錯。

一場真情剖白開始解開喬爾長達二十年鬱結

艾莉係一個處於青春期嘅少女，自小雙親雙亡同目睹最好嘅朋友被感染死亡，之後又被告知有機會成為世界嘅救星，內心都係複雜嘅，情感變化都唔俾喬爾差，但在下繼續講講到聽朝都未講完。但不得不說艾莉搞怪嘅性格係呢個末日世界都算係一股治癒清流。

緊湊輕鬆交替嘅流程

由一開始逃避政府軍隊離開隔離區，去到充滿感染者嘅圍牆外，仲有各種殘暴嘅掠奪者，其實整躺旅程都係驚險萬分。尤其係有敵人出沒嘅地方更加要步步為營，相當蹦緊。但係遊戲嘅節奏就相當好啦，快慢得宜。係一啲危險區域之間會有啲相對安全嘅地帶俾大家抖啖氣，玩下搬箱或者擔梯呢啲簡單機關，行下森林騎下馬，享受一下四野無人嘅清靜。有時會有唔同嘅同伴加入助玩家一臂之力，等我地唔洗長期精神緊張。 一定要提到嘅就係故事尾聲嘅長頸鹿劇情，玩到呢一幕嘅玩家都已經經歷完一段漫長又驚險嘅旅程，亦都聞到故事差唔多完結嘅味道，呢個時候出現左一群治癒嘅長頸鹿，睇Youtube其他玩家嘅反應有好多都係呢個時候將抑壓已久嘅情緒爆發出黎。在下就冇咁激動，只係挨係牆上面靜靜享受呢段輕鬆嘅時間。

經歷完暴風雨出現治療嘅長頸鹿

就咁靜靜享受呢段美好時光

另外就係劇情嘅發展，岩岩提過故事嘅大綱唔算好特別，但係劇情嘅展開就非常令人意想不到。第一次玩嘅時候一定係滿滿嘅驚喜。因為在下嘅第一次玩嘅時候感覺劇情發展總係係最絕望嘅時候突然出現希望，以為一帆風順嘅時候就會出現危機，有時劇情突然黎一個反高潮，真係又驚又喜。

黑人兄弟嘅結局相信殺好多玩家一個措手不及

題外話，今年終於傳出HBO將《The Last Of Us》美劇化嘅消息，出左之後在下一定會追睇。

故事/遊戲內容小細節

主線劇情驚險緊張又有少少悲傷，從表面睇已經係非常唔錯。但係其實遊戲入面仲暗藏好多小細節，係角色對話之間啦，或者撿拾番黎嘅文件，有啲會令你會心微笑，有啲會令你細思極恐。係呢度先連結番一開始關於「政治正確」嘅問題，係第一集故事你會發現︰女主角艾莉係一個女同性戀者、男主角朋友比爾係一個男同性戀者，佢幫喬爾搵到一架車、反抗組織首領係一位黑人女性。以上呢啲設定都冇玩家表示有任何反感行為，所以在下先擔心洩密事件嘅激烈行為真係劇情出左事。

所以艾莉係新作入面識得彈結他

一啲隱藏少少嘅細節例如喬爾有極大可能曾經做過掠奪者，火螢組織出現內鬥事件，關於病毒嘅調查等等。比較有趣嘅一個小細節就係艾莉係玩具店拎走黑人弟弟山姆嘅機械人玩具，如果玩家視角一直都望住隻機械人，艾莉都會傻傻咁望住隻機械人。只要玩家視角一離開，再番轉頭就會見到地下面嘅機械人唔見左，同埋艾莉好鬼祟咁跑。再要講Naughty Dog有幾注重呢啲小細節，可以留意遊戲入面嘅對話，喬爾曾經講過事件完結之後教艾莉游水同彈結他。係《The Last Of Us Part II》嘅宣傳Gameplay同宣傳片入面會見到艾莉已經將呢兩個技能都學識啦，喬爾果然有兌現承諾。

一個幾有趣嘅細節係末日之後嘅燒烤係燒老鼠食嘅

場景設定同遊戲畫面

雖然2020年睇番轉頭，《The Last Of Us》嘅畫面表現好似係一般水平，係2013年黎講已經係超級高水準嘅作品。尤其係故事描寫嘅末日後世界，經常會見到雜草叢生嘅環境，又或者俾真菌感染嘅事物，畫面都非常細膩。人物表情動作表演都相當到位，只係當時技術嘅極限似乎對一啲毛髮嘅處理比較突兀。

傾倒嘅大廈由外到內都做得好逼真

根據劇情發展，喬爾會到訪唔同嘅地方，高中、大學、醫院、鐵路、小鎮等等嘅地方。製作組將呢啲地方以末日後嘅狀況重現，而且場景細節設計一啲都唔馬虎，例如末日後嘅辦公室，工作枱上面嘅文具各種細節都有做番出黎，非常真實，比玩家真實體驗呢啲日見夜見嘅事物末日之後會係咩野狀況。郊野環境等等會出現各種小動物，時不時會睇到一啲好靚嘅風景，有時見到呢啲光景會不禁諗，會唔會人類滅絕其實係地球嘅復原呢?

敵人設定及遊戲性

上面講左成大堆劇情上嘅野，但係得個劇情唔好玩咁我不如去睇套戲啦，咁究竟呢個遊戲好睇之餘好唔好玩呢? 我地先睇一睇係呢個護送嘅過程會遇上咩野敵人先。遊戲入面嘅敵人可以分成兩個大類別。

第一類係敵人係人類。末日後嘅世界有三大勢力對立，包括政府軍方、反抗組織火螢、流落野外嘅獵人。主角基本上會遇齊哂三個勢力，但係三個勢力嘅人類敵人都係差唔多，軍隊同火螢都係重裝甲同裝備，獵人就比較多唔同武器同土炮啲，佢地會使用武器攻擊玩家，會進行有組織嘅搜捕，見到奇怪嘅事會提高警覺。

第二類敵人係感染者，根據故事設定受真菌感染嘅人腦部會被侵蝕，原理就好似冬蟲夏草咁，有興趣研究下。根據受感染嘅時間，感染者視力會慢慢衰退，相反係會發展出類似蝙蝠回聲系統嘅靈敏聽力同強大嘅力量。故事總共出現過四種唔同狀態嘅感染者，佢地有自己嘅強弱點。

暫時出現最嚴重嘅感染者巨無霸，見到都唔想打，好彩佢嘅視力已經完全退化，一般情況可以安靜咁繞過，避免問戰

花一大輪篇幅去介紹敵人因為遊戲入面最好玩嘅就係由玩家去選擇點樣去對付唔同嘅敵人配置。例如在下鐘意玩潛行，除左某啲強制正面對決嘅場景，幾乎全部關卡都係潛行咁過，對人類敵人就要留意敵人嘅圍捕、屍體位置會唔會太顯眼，面對感染者就要留意放輕腳步、同時要注意仍然有視力嘅感染者。有時子彈多起上黎可以會想正面對撼，面對人類敵人就要識搵掩體、同玩槍戰差唔多，感染者嘅特性就係蜂擁而上，考驗玩家跑位同反應。

有時可以同同伴合作同時暗殺

另外一定要提嘅一點就係資源管理係呢個遊戲入面係非常重要。除左講緊點樣慳子彈呢樣野之外，遊戲入面有一個合成系統，就係將搜括到嘅物資合成為有用嘅野，例如搵到酒精同布碎可以合成急救藥包治療傷勢，但又同時可以合成汽油彈，基於遊戲嘅資源唔係咁充裕(尤其係第一次玩嘅時候唔知接落黎會發生咩野事)，玩家就要取捨合成啲咩野去應付接下來嘅戰鬥。

呢個遊戲冇所謂嘅Boss戰(夾硬要講其實有兩個Boss戰)，對玩家黎講Boss就係唔同嘅地形同唔同嘅敵人配置，呢啲唔同嘅Setting就好似一道道難題咁，玩家可以依照自己嘅喜好、身上有嘅資源去攻略唔同嘅關卡，考策略、考技術、有時仲會考耐性，玩到悶悶地又可以轉個打法，遊戲性可以話係爆哂登。

同戀童癖大衛嘅困獸鬥係少數嘅Boss戰之一

人性嘅探討

遊戲有一幕會見到一群獵人追殺一對男女，之後發現佢地身上冇食物之後就走左去。令我不禁諗起一啲問題。美國心理學家提出過人類需求層次理論，人類嘅需求由低至高係生理需要、安全需要、社會需要、尊重需要、最後係自我實現。

三種人類勢力係處於唔同嘅層次，獵人只要有得食就得，係生理需求；政府建設隔離區但係處之泰然，係社會需求；至於火螢希望拯救世界，回復世界，係自我實現。三方有咁劇烈嘅衝突其實係關乎佢地需求層次好唔同。有時在下會不禁諗係唔係人類得到嘅野太多，因為唔滿足所以先會不斷提升自己嘅需求呢？獵人冇進入隔離區嘅資格，所以不擇手段去生存其實係冇錯，只係地球將人類擁有嘅野奪取之後，一切又回歸適者生存嘅世界，俾喬爾嘅殺殺戮只不過係一個物兢天擇嘅過程，咁應唔應該有罪疚感？人性呢樣野係唔係多餘嘅呢？

火螢以拯救人類為目標，希望世界能夠回復病毒爆發前嘅狀況，看似好偉大，但細心諗一諗其實會唔會都係自私嘅行為？我地可以透過遊戲見到人類減少後環境有變得更好嘅情況，拯救人類嘅行為會唔會其實係相對地咁破壞緊呢種美好嘅光景呢。另外火螢需要艾莉嘅犠牲去製造疫苗，其實跌入左一個類似「火車難題」嘅一個命題。

殺一個定五個

咁唔通好似政府咁處之泰然，讓一切順其自然就係最岩？身為領導者可以做嘅野其實好多，如果政府可以做一啲野係收容流浪在外嘅獵人，慢慢以而家嘅生存者去重新建立國家，就好似諾亞方舟嘅故事咁，相信會係最好嘅結果。當然世事冇絕對嘅對錯，我亦都唔係想話遊戲入面嘅人嘅所作所為係唔岩，只不過呢啲行為都好引導到在下嘅反思。最後喬爾救走艾莉嘅結局如出一轍，是對是錯眾說紛紜，其實一切都只不過係人性。

結局喬爾所做嘅事極具爭議性

小吐糟+小總結

人無完美，遊戲都冇嘅。雖然上面我讚到個遊戲飛起，但遊戲入面有一樣野真係好破壞到我嘅體驗，就係裡面智障嘅AI系統。因為遊戲性嘅考量，NPC係唔會被發現，NPC就好似透明人咁，就算NPC係敵人面前直行直過都唔會被人發現，呢一點我係接受嘅，如果NPC都會被發現咁基本上唔會潛行得到，為左保持遊戲性而放棄少少合理性係可以接受嘅。

但係NPC嘅設計係一個實體，姐係話佢係會阻擋玩家嘅去路。潛行嘅時候經常要捕捉敵人嘅去向去靈活走位，NPC經常吊住玩家尾塞住玩家嘅走位，好多時就係因為果一秒半秒卡一卡就令到玩家被敵人發現。有時NPC仲會發神經係玩家潛行嘅時候亂衝亂跑，雖然敵人唔會發現NPC，但係有時佢地會將玩家撞出掩體外面，有時會將敵人撞到去見到玩家嘅地方，將玩家嘅努力毀於一旦。有時一啲戰鬥場面NPC又會係度散步唔做野，真係睇見都嬲。

黑人弟弟山姆係在下Gameplay入面係發神經次數最多嘅NPC

小總結︰基於強大嘅劇本同遊戲性，加上潛行類遊戲完全係在下杯茶，所以呢個遊戲至今依然係在下心中嘅第一位。好多朋友叫我推薦PS4遊戲我都必須會推薦呢一款，總之唔玩一定後悔呀。

最後一齊加油