一日24小時，我地究竟用左幾多時間，去做有意義嘅野？而你，又會點樣分配呢24個小時？
有人事業為重
有人愛情大過天
有人做學霸
都有人正義感豐富，幻想拯救世界
而公平嘅係，每個人都只有24小時，不論你智力爆表，定係顏值突破天際，你都只係有24小時可以用。如果，有一個世界，係比你真係有能力打動人心，改變命運，你對時間嘅選擇，又會唔會有唔同？
女神異聞錄5皇家版就係一隻你會忙過返工嘅遊戲，你會感受到，原來宜家做人，真係好難。首先講下咩叫皇家版，皇家版就係女神異聞錄5（persona 5）嘅延伸版，原版嘅persona 5 已經係一隻好優秀嘅遊戲，而皇家版只係原有嘅故事上，加添幾個人物，同埋做左一大堆改動，本體上係同persona 5 係無分別嘅。隊長係之前已經玩過原版，但係對呢隻遊戲嘅喜愛，就算係有啲比人呃錢嘅感覺，都係果句。
主角係一名高中生，因為某啲原故，去到一個叫四軒茶屋嘅地方。機緣巧合之下，發現佢同埋其他幾個被選中嘅小朋友有個特異功能，就係可以進入人地個心。先說明一下，遊戲入面指出，人類係有陰暗面存在係個心入面，呢啲陰暗面會令人表示“惡“嘅一面。係陰暗面存在嘅世界，果個人係會將佢點樣睇人，點樣認知人嘅一面還原出一個存在係心入面嘅世界（我知係好難明，基於唔想劇透，自己試下隻遊戲啦）。主角就係要打破存在係呢個世界嘅陰暗面boss，從而令人悔改。
咁主角一個中學生，無可能做咁多野架嘛，所以就要“take your time“ 去加強自己，或者加強自己同伴嘅能力，先可以做到呢個不可能任務。點樣“take your time“，就係呢隻遊戲嘅精粹之一。
老實講，之前可能我唔識欣賞，睇人介紹果陣我係覺得，咁核突嘅畫風，點玩呀？事實係，美術呢家野就好見仁見智嘅，你接受到咪ok囉，接受唔到嘅，多講都無謂。
而呢隻game，吸引嘅係個育成系統。表面果隻育成，就係有唔同嘅人格面具（你當係pokemon入面嘅小精靈啦），升lv，學技呢啲每一隻rpg都有架啦。
我想講嘅，係深一層嘅育成。主角有五圍，包括智力，膽量，魅力，靈巧同溫巧，呢方面同現實嘅你同我都好似。不過做得主角，梗係呢五樣都要搞得掂。除左你個人本身嘅質素，你同其他人嘅相處，都係社會上必要嘅條件，正所謂，識人好過識字。主角身邊有好多夥伴，一部分係會並肩作戰嘅，另一部分嘅就會默默支持你。你要係提升自己嘅同時，都要同人相處。同人關係好啦，又會幫到你提高自己能力同埋戰鬥。但有時你要同人相處到，你自己又要有番咁上下quali，人地先會理你。呢幾樣元素環環相扣，可以話少一樣都唔得，你話你一日入面係咪忙到痴線？係要自己upgrade定係同人相處呢？呢個你就要take your time。
去到呢度，比我嘅第一個反省係: 究竟我有無係人生入面，過於側重一樣野呢？如果咁樣，對我自己嘅成長又有幾多呢？會唔會到我end game果日，發現原來我嘅人生，係升級得唔夠全面，比人落後好多？
上面都提過，啲boss其實係代表七原罪。而每隻面具，都係用番神話或者歷史人物去改名，加埋有番果個人物嘅小小介紹，感覺上，就睇緊一啲人物傳記咁，好多野學到。佢每一個歷史人物嘅選擇，都係有啲反抗嘅意味係入面，反映番主角一行人反抗社會上面大眾嘅劣根性，證明係選角方面，係有落過一番心機。值得反思嘅係，當呢個世界都本著七原罪過生活時，你又有無能力，有無膽量去反抗七原罪同世人嘅誘惑，忠於自己相信方向前進？
而最最要讚嘅係，呢隻遊戲嘅音樂可謂十分到位。玩過persona5嘅朋友，上次音樂已經好正，表達出一眾主角成為偷心賊嘅神秘。而今集沿用上集部分歌曲，替換左啲新嘅音樂，就表現出皇家版嘅華麗。而每次要打boss之前嘅音樂“Life will change”不論係音樂上，定係歌詞上，都好配合番成個偷心嘅過程，連隊長沖涼果陣，都不斷哼住呢啲歌，證明十分入腦。尤其係你玩完個遊戲，聽番隻歌，你就會feel到呢隻歌係有幾神。
遊戲時間會好長，每一個角色嘅刻畫都好明顯，好深刻。佢地各自有唔同嘅故事，需要的起心肝反抗，如果唔反抗，Life 又點會change呢？再一次提到呢隻音樂，又想再回味一次。
最後都有啲野係要彈下嘅，就係呢隻game嘅小遊戲部分。有啲今次新加嘅小遊戲，好似飛鏢，玩法無咩突破，但見佢玩完都會加下某啲能力，咁都算啦。好似打棒球，釣魚呢啲，我成隻game唔係要白金都唔會去做下，呢part實在係有啲悶。不過始終一隻遊戲，其他方面遊戲商擺咁多attention落去，小遊戲唔吸引都算情有可原。
反而鑑於呢隻game有好多可以用黎鑑賞嘅野，今集新設一個叫my palace嘅地方，比你用啲點數買番啲cutscene，音樂比大家回味。而且係my palace入面有得玩個類似鋤大D嘅小遊戲，比你儲pts unlock片同音樂，都叫做有啲誠意。
總結成隻遊戲，不論係題材，劇情，同埋聲畫配合都非常好，令人玩完之後，不但有種「呀，呢個旅程終於完，好令人感動」之外，仲會令你反思，我地係咪真係要改變一下，做下革命，反抗一下，先可以打破呢個社會上咁壞嘅風氣。呢種反抗，未必一定要上到社會上，但最少，要打破自己潛在嘅心魔。最後，送上幾張隊長係game入面cap嘅圖。
今次嘅分享就去到呢到，希望呢隻遊戲，會帶一個唔同嘅生命規劃概念比你。
我係隊長，下次再同你分享遊戲。
留言
張貼留言