你會覺得無得扮靚扮型，要成個薯仔咁。（咁當然有啲學校嘅風氣，就係啲校服有幾短得幾短，有幾不羈得幾不羈）
都有人會覺得咁多功課，又有考試測驗，最討厭就係呢啲。
Sorry，拉遠左，講返隻game。軌跡系列其實就係講緊係一個叫塞姆利亞嘅大陸上，有兩個主要嘅勢力，同埋一啲小勢力。唔同嘅勢力當然呈現住敵對嘅關係，而閃之軌跡就係關注大陸西方嘅軍事大國《埃雷波尼亞帝國》入面嘅事。
其實閃之軌跡係可以叫做軌跡系列三部曲入面嘅最尾一部，第一部係講關於一個民間團體《遊擊士協會》嘅空之軌跡（三集），第二部係講鄰近《埃雷波尼亞帝國》嘅自治洲《克洛斯貝爾》嘅零之軌跡 + 碧之軌跡（五月六月會出中文版，到時會再同大家分享）。咁點解一講就講三部曲入面最後嘅閃之軌跡？係因為其他嘅都未出PS4版，零碧就遲下出，空軌就未有消息。而且遊戲商都講左今年會出埋《創之軌跡》，叫做幫軌跡系列做個結尾。
可想而知，一個大陸咁多勢力，國仇家恨，呢個系列肯定好龐大，而且會環環相扣，角色之間有住好微妙嘅關係。淨係單講閃之軌跡，佢都出左四集先完（雖然有人係話佢拖戲）。咁隊長要分上下講閃之軌跡，有三個原因。
第一，係因為閃之軌跡1同2，係PS4上面個正式名係有個《改》字。何謂改呀？呢兩隻遊戲係重製版本，最先係PS3年代已經出左，係PS4上面加左啲系統，所以係改。閃之軌跡3同4就係全新係PS4推出，所以要分開。
第三， 閃軌1、2 同閃軌3、4入面主角嘅身份唔同左，所以要分開。
好，講左咁耐，係時候返去閃之軌跡1、2改啦。主角係叫做黎恩，將會入讀帝國入面嘅軍官學校《托爾兹軍官學校》，叫做學習點做軍官啦。由於佢係主角呀，所以佢同另外8個同學仔入左一班特別班，學習內容同其他班唔同，要出外實習。閃軌1就係講下呢班同學仔係呢個大陸上面實習嘅時候發生嘅事同埋陰謀。
呢一班特別班入面，同學仔就唔多，但係個個背景都好特別。經過一番嘅事情，佢地嘅感情都日漸深厚，變成可以共渡困難嘅伙伴。
閃之軌跡1,2 改由於係重製，玩過嘅朋友可能覺得無咩吸引。隊長之前無PS3，所以就無玩過閃軌嘅，反而係玩PSP嘅零軌碧軌先，覺得玩法同故事好好，所以先入坑。
老實講，呢兩隻game畫面就唔算高級架啦。比大家睇下啲畫面先
同好多大game比，呢啲畫面實在係唔係好掂。隊長會話，玩呢隻game嘅，係玩戰略性同埋隊伍配搭。
每個角色都有佢地用嘅武器，都因為佢地用嘅武器，殺比到佢地一啲定位。例如係用大劍嘅女同學係物理輸出手，攞法杖嘅班長係法術輸出，仲有回血嘅，有萬能嘅…… 點樣配合隊伍，就係呢隻遊戲嘅重心。
除左配搭上場角色，分配佢地嘅工作之外，每個角色嘅培養方向都係好引人入勝。唔同角色都有一個叫“導力器”嘅野，可以當作係比你配啲配件入去加強角色嘅能力同比佢地用到唔同嘅法術。導力器嘅配置每個角色都唔同，有住唔同嘅限制，都可以話有唔同嘅可能性。考慮導力器本身嘅限制，可以配出心目中最完美嘅角色，呢啲配置無絕對對錯，呢樣我覺得先係軌跡系列嘅重心。
另一樣好吸引隊長嘅，係佢戰鬥嘅系統同畫面。戰鬥方面，基本上係完全唔會有動作嘅元素係入面（除左小量要即時禁嘅追加攻擊），系統係靠敵我嘅速度，決定邊個可以出手先。除左法術用嘅MP值，仲有戰技用嘅AP值。攻擊，被攻擊都可以儲到AP值，所以戰技好大程度上會經常用到。左邊條bar會show到出手先後，當然用技用法術，都可能改變到呢條bar嘅先後。思考點樣出手，思考下用咩技咩招先，又係好好玩嘅一部分。
而戰鬥畫面方面，要講下嘅就係出必殺嘅場面，欣賞唔同角色出技，都係可以好期待，好賞心樂事嘅（尤其是有啲女角，隊長個人係覺得幾吸睛）。
老實講，無玩過前幾作，軌跡系列可以係好悶，可以發展得好慢，拖得好長。可能，只係因為一個巧合，比隊長接觸到軌跡系列，又覺得佢戰鬥系統幾吸引，呢啲巧合，就成為我同軌跡嘅緣份，先可以接觸到呢個咁宏大嘅世界觀。聽到就出嘅創之軌跡係系列嘅完結，有啲感慨之餘，多少都夾雜左啲失落。
我係隊長，下次再同大家講遊戲。
留言
張貼留言