Resident Evil 3 Remake 將會係今年4月3日上架，作為長久以黎咁多集都玩足嘅在下，一定會支持支持。經歷過Resident Evil 2 Remake 嘅成功，將經典二代嘅恐怖生存以重新面貌詮釋，唔單止吸引左一啲新玩家接觸Resident Evil系列，一眾舊玩家都因為遊戲入面嘅彩蛋或回憶玩到不亦樂乎。Capcom當然食過番尋味，馬上宣佈重製1999年推出嘅Resident Evil 3，而係嚴峻嘅疫情環境下，Capcom仲非常肯定咁話遊戲上市絕對唔會延期。
而Capcom就係前幾日發放左試玩版俾所有人下載，大家都可以試玩大約十五分鐘長度嘅遊戲內容，在下為各位送上呢個試玩版嘅賽後報告。
👉👉👉👉👉👉大門若隔開 分隔開👈👈👈👈👈👈
係講今次三代重製表現之前，一定要先輕輕講一講佢嘅前作二代重製。在下非常之喜歡二代重製版，甚至激到要上討論區分享攻略。
畫面、遊戲性、操控大躍進，新玩家易上手
重製版同原版足足相隔左二十年，所以呢款重製可以見證遊戲製作技術係呢二十年嘅進步。呢款重製並唔係只係就咁執一執啲畫面就算，而係完全重新再造過。使用左新引擎RE Engine之後，除左畫面質素大大提升，操作嘅流暢度都比起七代更加進步。
 |
| 一圖睇哂二十年之後嘅畫質提升(gearnuke圖片) |
 |
| 光影效果非常好，落雨濕漉漉嘅效果都呈現得好真實 |
除著時代轉變，好多RE嘅舊元素已經落後。例如以前嘅嘅開門動畫，電影式運鏡等等係新時代已經唔再適合Resident Evil，所以重製版將原版轉變為第三身射擊遊戲，無縫過版呢啲元素亦都大大提高遊戲嘅流暢度。
 |
一代重製雖然畫質提升，但係冇改到操控同電影鏡頭式畫面，對一款需要射擊嘅遊戲黎講係好困擾。
同年代嘅Metal Gear Solid同樣係以電影運鏡呈現，但係就可以進入第一身視角視察環境，成件事差好遠。 |
保留恐怖生存風格，老玩家依然喜愛
對於老玩家黎講，最驚我地鍾情嘅「恐怖生存遊戲」變為一款割草式遊戲。RE系列本來以「恐怖生存」為賣點，玩家最享受嘅係果種彈盡糧絕嘅情況下去探索一個未知領域嘅刺激感，因為遊戲會困係一個空間入面探索，例如一代會係一個大型洋館入面探索，而二代就有一段時間都會係警署入面探索。玩家往往需要左度右度點樣有效咁運用手上嘅資源，同規劃路線。而呢個系列去到四代已經開始變質，變成一款線性闖關遊戲，去到六代嘅體術設定更加離譜，令到呢款遊戲變左「喪屍無雙」。雖然更加符合大眾口味但係就完全違背左呢個系列嘅概念。遊戲發展去到七代終於稍為回歸主題。
 |
想用無限子彈嘅強力武器將遊戲變成無雙遊戲就要先以最高評價通過最高遊戲難度，挑戰性十足
(官方後期決定同時以付費DLC形式上架) |
非常慶幸二代重製雖然加入左好多新元素，但係依然有保留恐怖生存嘅概念。除左遊戲入面陰森恐怖嘅氣氛形造得好好之外，難度設定都好準確，有一定嘅挑戰性但又唔會難到要掟手掣。戰鬥方面除左取消左Over power嘅體術設定，今次加左斷肢嘅設定，比左玩家一個新嘅遊玩體驗，唔會太過火，而且仲好符合現實。
 |
| 斷肢係高難度通關一個非常實用嘅技巧 |
經典畫面重現以及各種小彩蛋
呢種重製版最令人期待嘅就係佢點樣重新演繹一啲經典畫面，RE 2 Remake就絕對冇令大家失望，各種經典畫面以超高畫質重現幕前，運鏡演出都係一流，有一種電影嘅感覺。比較有趣嘅地方就係原版嘅鱷魚戰就改為一場追逐戰，在下覺得呢個安排非常之好，被鱷魚追逐嘅呈現十分震撼又不失遊戲性，係一段冗長對話之後黎一個急速嘅追逐戰，節奏控制得好靚。
 |
| Ada姐姐型爆登場，呢個黑超Look有冇覺得佢似一個香港藝人? |
另外老玩家最愛嘅一定係遊戲彩蛋。原版最大嘅彩蛋就係Wesker辦公桌私藏Rebecca嘅照片，製作人都有將呢個彩蛋加入重製版入面，玩家需要大費周章經歷一系列調查先有搵到。遊戲入面仲有好多好多嘅彩蛋，隨便係Youtube搵一下講彩蛋嘅影片都可以講十幾二十分鐘。
 |
| 原版其中一個場景有一個串錯字嘅"WELCOME"(多左個L變左WELLCOME)，重製版入面製作人整番個L自嘲一番 |
敗筆之處﹕紊亂嘅劇情線
雖然相隔二十年之後好多地方重製版都提升左，但係在下認為有一個地方反而退步左，就係劇情表演。二代劇情有兩個主角，Leon同Claire，係原版劇情佢地兩個嘅故事線會有好多相遇交流嘅地方，而且兩個故事線剛剛好係可以拼湊成一個完整故事。重製版佢地交錯嘅地方就大大減少，但係佢地兩個嘅關係又依照舊版描寫咁表現得好熟絡，非常唔合理。雖然遊戲入面講一周目同二周目加埋係一個完整嘅故事，但係事實絕對唔係咁。雖然兩位主角走唔同嘅路線，但係佢地做嘅野，打嘅Boss係完全相同，兩位主角就好似活係一個平行時空一樣，除左劇情強行留下嘅字條之外，係遊玩期間完全搵唔到另一個主角存在嘅痕跡。呢方面舊版就表現得好好，例如佢地係接力式咁打唔同形態被注射左G病毒嘅William，成件事就講得通。
講起呢個話題，同樣係Resident Evil系列嘅作品Resident Evil Revelations 2對於兩個主角前後腳經過同一個地方之間嘅互動就非常之好，早一步到嘅主角嘅行動會影響到後一步到嘅主角。明明曾經就做得到，但係反而係新作就失手。
👉👉👉👉👉👉大門若隔開 分隔開👈👈👈👈👈👈
廢話太多，終於入到正題，開始玩三代重製嘅試玩！
 |
| 竟然可以選擇漢語語音，不過都係聽番英文順耳啲 |
 |
| 封面就係成個遊戲一直同主角糾纏嘅追跡者 |
 |
| 試玩版直接由Carlos帶Jill見長官呢幕開始，係原版劇情入面算係中前期嘅情節 |
 |
| Carlos由青靚白淨靚仔變左粗獷型男 |
 |
| 本來睇Trailer覺得Jill嘅面相好顯老，但係實玩起上黎都唔係咁差 |
 |
| 當然著番呢套經典服裝好睇啲，但係似呢套服裝以特典形式登場(一代重製版畫面) |
 |
| 射擊同二代重製冇乜大分別，如果唔係企定定準星會擴散 |
 |
| 物品欄介面都係同二代一樣，簡潔易睇 |
 |
| 場景牆身上面不忘賣個廣告 |
 |
| 呢個公仔係Demo入面嘅收藏要素，有成二十個咁多，在下就唔慢慢搵啦 |
 |
| 第一隻喪屍登場，高水準呈現 |
 |
| 實測斷肢依然可以用，相信係通關上有好大發揮 |
 |
| 光影表現非常出色 |
 |
| 今集新增嘅閃避動作，熟練之後必定大有作為 |
 |
| 呢一句… |
 |
| 試玩版尾段會拎到散彈槍，可以一試一槍爆頭 |
 |
| 射擊爆炸物會造成大爆炸，呢個元素相信對快速通關非常重要 |
 |
| 追跡者霸氣登場 |
 |
| 追跡者唔似二代暴君咁慢慢行，佢會瘋狂追擊主角。逃跑既可恥又冇用，不如同佢正面對決打低佢製做空檔 |
試玩版黎到呢度都差唔多完結啦，玩完之後就更加心郁郁想快啲可以玩到實裝版。新嘅閃避系統非常岩我口味，雖然經常失手，但係希望可以慢慢熟練。
個人感覺「恐怖生存」風格依然拿捏得唔錯，通關有一定嘅挑戰性，去到空曠嘅城鎮上面其實處處暗藏殺機。將後面幾代嘅環境傷害元素放番去呢一代入面，相信會製造到一個幾好嘅新體驗。
劇情方面，原版係非常之短嘅。根據Capcom嘅公怖，今次嘅重製版會加入新嘅劇情，令人非常期待。雖然今次同樣係雙主角，但係佢地以接力形式行動，相信唔會出現上面提到「連唔到戲」嘅情況。
比較起二代重製，三代唔單只保留左好嘅元素，仲加入左一啲新嘅玩法，絕對值得在下買番一隻支持下。
留言
張貼留言