作為我第一次撰寫嘅文章（同有心人嘅一啲交流/分享），點都要寫得好好睇睇，響個頭炮，震下家聲!
由於隊長都熱愛玩game，手機game，PS4等等都有玩。玩game同男仔睇女一樣，各有各愛好。有啲鐘意長腿
有啲鐘意樣靚
有啲鐘意大波
都有人鐘意乜都有
（滿足下一眾男觀眾先)
遊戲都一樣，有人鐘意動作類，有人鐘意用腦諗下嘅戰略類，都有人想唔洗點付出就比你打到天下無敵咁。隊長自己就幾喜歡玩戰略，或者叫戰棋game用啲策略嘅遊戲。一黎隊長反應唔快，好似啲mon hunt呢啲個個吹到好正嘅，隊長連機都打唔爆，次次都要隊友神carry，更加唔好講咩仁王，dark soul果啲。
再者，隊長鐘意先睇下電腦/對方咩佈陣，再用自己思考完嘅方案去嬴，呢種先係我想要嘅成功感。
所以，第一隻要分享嘅，都會係我以後好大量會再share嘅，就係手機game - 夢幻模擬戰。
夢幻模擬戰呢隻手機game其實18年10月4號已經推出左，而呢個系列其實係更早嘅時間（1991年）係世嘉嘅MD已經出現，所以呢隻game好長嘅歷史。咁當然，去到手機遊戲，玩法多多少少都有啲唔同，但係大致上方向都係類近。
入到game就係呢個版面，同宜家市面上好多嘅遊戲版面設定差唔多。來來去去都係有條主線，有好多刷素材關，打錢關，再加啲高難度少少嘅關卡送啲高級道具比你。不過正如隊長之前講過，夢幻模擬戰係隻好耐歷史嘅遊戲，當然要比有玩過嘅舊玩家回味下，同時無玩過嘅新玩家，都不妨欣賞下呢隻出左5集嘅歷史文物。放心，玩舊故事（時空裂縫）嘅時候，畫質係符合現今世代嘅，唔會比幾十年前起晒格果啲質素。
講左咁耐，點解隊長會係芸芸遊戲之中，揀左呢隻遊戲做響頭炮，震家聲嘅選擇呢？黎緊我會列出呢隻遊戲隊長最欣賞嘅地方
1. 畫功精緻
作為新世代嘅遊戲，畫質係其中一項決定隻遊戲可唔可以入門嘅因素。一般遊戲都唔會忽略呢一樣野，老實講，如果連呢一樣野都唔做好，咁果隻遊戲其實9成都可以入堆填區。但係呢隻遊戲，滿足到玩家鐘意睇靚野嘅慾望。（溫馨提示：所有角色，係物理上可以彈跳或者郁動嘅野，佢地都係真係識郁，好似係裙擺，頭髮，同埋😏😋）
2. 角色定位分明
咁一般嘅SRPG都係每個角色都有唔同數值，好似係力量，智力，防禦，魔防，速度等等，大同小異。而夢幻模擬戰都一樣。呢啲數值，係話你知呢隻角色係咩類型嘅角色，等你唔會拎隻法師去同人近攻肉搏，拎隻奶去做血盾擋血。夢幻模擬戰優勝嘅地方係，每個角色都有唔同嘅天賦，令每一個角色定位或者用途都可以有無窮嘅變化。咁嘅安排，令到有啲稀有度唔高嘅角色，都有存在係呢個世上嘅意義，而唔係SSR大晒玩晒。
而每隻角色都有兩至三條嘅職業線，令到佢地係打法上，以至係全隊配合上有好多嘅變化。更厲害嘅地方係，每個角色除左有自己嘅職業，佢帶嘅小兵都有唔同嘅用途同埋職業，咁樣嘅配搭，可以講得上係天衣無縫，好考玩家嘅心思同思考能力。
3.技能設計有心思
要幫一個角色營造出令人更深刻嘅印象，技能嘅選用同搭配尤為重要。夢幻模擬戰嘅角色，有啲係通用技能，有啲就係特定角色先有嘅特有技，配合番職業同兵仔嘅組合，同一個角色已經可以有好多不同嘅效果，因應你係咩性格，玩法而去制定最適合你嘅角色。
4.高練度SSR唔再係重課玩家嘅專利
有啲遊戲，係，SSR會比你。但係你想突破呀，sorry喎，一係你努力啲儲石再抽人突破升rank，一係就課金買石囉。夢幻模擬戰入面，SSR都係要抽，但係抽完之後，你可以打羈絆故事，一日最多攞3-4粒碎片。只要你使用耐性與時間
你一樣可以入手六星SSR，不過你想快呀，咁要快餐啦……呀唔係，係課金
5.關卡設計
夢幻模擬戰係一隻戰略遊戲，咁多多少少都要你用下腦思考。而呢隻game去到後期，先唔好講你要攞挑戰成就，就連你要三星過關比你開掃蕩刷素材，都要思考一大輪，有心思嘅玩家就好鐘意，無耐性諗野嘅，可能係一大地獄。
都仲未講佢每個星期嘅更新活動，精選抽卡池等你易啲抽到心水嘅角色，仲有大量可以換嘅服裝（雖然係比重課玩家嘅玩意）…… 呢隻game優點太多，今次可能都未數得晒。
隊長之後會keep住分享下角色嘅用法呀，講下佢地嘅故事，等多啲人一齊入坑呢隻咁有趣嘅遊戲，鐘意嘅，就密切留意啦。最後比張game入面嘅福利圖比大家。
我係隊長，下次再同大家分享遊戲。
留言
張貼留言