"開箱"兄弟之絆一番賞, 戰果大整理

二月初嘅時候，在下去左東京鐵塔入面嘅One Piece Tower玩，當時係入面嘅商店見到呢套「兄弟之絆」嘅一番賞展示品，就立刻忍唔住怒抽一波，因為佢B至D賞個公仔造型好大隻，同埋超級靚仔。

當然我未敗家到可以包起成套一番賞，係勒住個銀包嘅情況下到底我抽左啲咩野番黎呢?事隔兩個月，終於要整理一下。

以上就係呢套一番賞嘅內容，對我黎講B-D賞就係大獎，A賞三兄弟細個一齊玩嘅場景好可愛，但係Not my cup of tea~

我總共抽左8次，究竟我抽到啲乜，馬上為大家揭曉！

👉👉👉👉👉👉大門若隔開 分隔開👈👈👈👈👈👈

第一抽

︾
︾
︾
︾
︾
︾
︾

我當時既第一抽就已經係D賞薩波公仔啦，我感受到幸運女神已經係我身邊，我果陣相信另外兩個兄弟都離我不遠矣，馬上再抽！

︾
︾
︾
︾
︾
︾
︾

於是就抽左以下呢堆野…

D賞薩波公仔會另外再做詳細開箱，今日先睇下呢堆E-G賞先啦。

G賞 - 名言色紙

抽到G賞係可以自己選擇想要嘅人物，但係我果套索羅同艾斯都俾人換哂，所以就先入手其他人物。

上面人物好似水墨畫咁好有風味，另外名言以毛筆字呈現都好有霸氣。

色紙厚度十足，但係就冇好似其他一番賞咁附送展示架，要另外買。

最後我以其他途徑入手左艾斯同索隆。

紅髮同白鬍子我就冇諗住入手啦，只想要年輕一代嘅人物。

F賞 - 玻璃碟

F賞就唔可以自己選擇想要嘅人物，只能夠由店員隨機派發。

打開之後原來係艾斯。

背面。相信唔會有人拎呢隻碟黎食野掛😂

E賞 - 記事簿套裝

一套有四本，上面分別路飛同艾斯係唔同時期嘅造型。艾斯最後一本只係得番頂帽，以表達佢已經離開左我地，只係淨番路飛同薩波嘅展影，睇見都令人心酸。上面句子寫住「多謝大家一直愛我。」就係佢臨死果陣抱住路飛講嘅野。

隨意門﹕"吹水"個人盤點十大海賊王爆喊場面

簿面有一塊膠片保護個封面。

入面只係一疊白紙。講真，邊個會捨得用呢…

D賞薩波公仔將會留番下次先詳細開箱，最後係度展示埋店員俾嘅小禮物。

店員竟然送左兩張閃卡俾我。

抽完其實仲可以參加二次抽獎，但係一定要有日本手機(講緊日本手機，唔係日本手機號碼)先可以參加，所以在下就無緣參加。

其中一張個編號寫住Sabo，我極度懷疑呢張係會中獎。