【音樂】音樂說 - 春秋

（音樂文係字多圖少，請見諒。）
隊長除左遊戲之外，都好鐘意音樂。事先聲明，我無做過專業嘅音樂訓練，所以啲專業嘅terms就講唔出嘅。我只係覺得，音樂係有種治愈能力，令你失意中，有種感同身受嘅狀況。更厲害嘅係，有可能你未經歷過果隻歌講嘅野，你都有機會意會到。

要做到呢一點，作曲，編曲，樂器，歌詞同歌手演繹方法就有好大嘅影響。所以，好嘅歌，係應該令一個無論有無相似背景嘅你，都可以感受到果首歌。當然，音樂賦予每人有唔同體會，千變萬化。

今次想同大家分享，我聽到嘅故事，係軒仔嘅“春秋”。

作詞：林夕   作曲：Edmond Tsang

編曲：C.Y. Kong 監製：C.Y. Kong / 張敬軒 那夜誰將酒喝掉 因此我講得多了 然後你搖著我手拒絕我 動人像友情深了 我沒權終止見面 只因你友善依然 仍用接近甜蜜那種字眼通電 沒人應該怨地怨天 得到這結局 難道怪罪神沒有更偽善的祝福 我沒有為你傷春悲秋不配有憾事 你沒有共我踏過萬里不夠劇情延續故事 頭髮未染霜　著涼亦錯在我幼稚 應快活像個天使 有沒有運氣再扮弱者玩失意 有沒有道理為你落髮必須得到世人同意 心灰得極可恥　心傷得無新意 那一線眼淚　欠大志 愛若能堪稱偉大 再難捱照樣開懷 如令你發現為你而活到失敗 令人不安　我品性壞 我沒有為你傷春悲秋不配有憾事 你沒有共我踏過萬里不夠劇情延續故事 頭髮未染霜　著涼亦錯在我幼稚 應快活像個天使 有沒有運氣再扮弱者玩失意 有沒有道理為你落髮必須得到世人同意 心灰得極可恥　心傷得無新意 那一線眼淚　欠大志 太沒意思 若自覺這叫痛苦未免過份容易 我沒有被你改寫一生怎配有心事 我沒有被你害過恨過寫成情史變廢紙 春秋只轉載要事　如果愛你欠意義 這眼淚無從安置 我沒有運氣放大自私的失意 更沒有道理在這日你得到真愛製造恨意 想心酸還可以　想心底留根刺 至少要見面上萬次

隊長認為，“兩個偉文”係現時可謂係填詞界嘅名牌，佢地啲遣詞，意境，可以說得上高深。呢隻歌唔係新歌，事實上隊長都好少聽新歌，感覺以前嘅歌到位啲。

「故事」

一個男孩，有一日鼓起勇氣，同心儀嘅女孩表達佢嘅心意。可惜，女孩拒絕。之後，女孩似乎唔識避忌，依然同個男孩相處得好埋。事實上，男孩自問無同個女孩經歷過驚天動地嘅事，都無野可以係個女孩心入面留低痕跡。男孩自憐嘅同時，有一絲絲自暴自棄嘅傾向。男孩甚至覺得，佢連傷心嘅資格都無，係女孩嘅心中，佢嘅愛根本唔值得提起，太過渺小。若果有一日女孩得到真愛，佢都應該送上祝福，而唔應該有恨意。

軒仔係呢首歌嘅演繹，加上夕爺嘅詞，完美將一個故事刻畫出黎。歌曲開頭，曲風平淡，就似係男孩表白失敗後故作鎮定。「難道怪罪神沒有更偽善的祝福」，正正係男孩相信，只係憑佢同女孩經過嘅事，根本唔會成功表白。而第一段chorus,歌詞同第二段差唔多一樣，結尾時聲音轉平和低落，表達男仔嘅失意。

第一段chorus之後嘅間奏，由低轉向稍微高，表達出男孩心情，彷彿未可以好似一開始咁，假裝平復。「如令你發現為你而活到失敗 令人不安 我品性壞」，隊長聽到男孩話「真係唔好意思啦，比你見到我比你拒絕之後，做人做到成pet屎咁，令你覺得自己好似做左衰人，真係好對唔住喎」。呢種自暴自棄嘅感覺，令人難受。音樂進入第二次chorus亦都開始亢奮，表達男孩開始激動。

夕爺一句「若自覺這叫痛苦 未免過份容易」，就將音樂帶向高潮。「你以為咁樣比人拒絕，就好痛苦？仲有更難受嘅係後面等緊你呀傻仔」。男孩自嘲自己同女孩嘅經歷，係對方眼中，只係雞毛蒜皮。因為呢啲咁雞毛蒜皮嘅野，根本無資格留係女孩心中留低漣漪。就算有一日女孩搵到佢嘅真愛，男孩都只有祝福，唔允許留低自私嘅恨意同眼淚。係女孩心中，佢地嘅經歷，男孩只可以自己心酸，想留下半點係女孩心中，唔該繼續忍痛，同女孩相處見面多一百幾十次，先有機會留低好少好少回憶。

軒仔本身唱功超凡，配合林夕嘅詞，獻上一個可悲男孩嘅故事。呢首歌，有相似經歷嘅人自然有共鳴，無經歷過嘅人，用心聽，彷彿自己就係果個男孩，心痛不已。

《春秋》呢首歌帶比隊長，就係一個咁嘅故事，一個sad ending。我諗每個人，都曾經有過心中果個好想可以一齊嘅人。好彩嘅，唔洗經歷《春秋》呢個故事，可以如願。唔好彩嘅，呢啲經歷，都會成為成長嘅催化劑，。日子耐左，諗返起嘅時候，都係一個回憶。

唔知你地，又會聽到一個點嘅故事呢？

我係隊長，下次再同大家分享音樂，說故事。