上次呢就開左女神娜美嘅Figure，為左係個Blog增添番少少陽氣，馬上開兩個剛陽男士嘅Figure。呢個係佢地係和之國嘅造型，髮型服裝都偏向古代日本服裝，路飛都唔再赤手空拳，配番把刀(雖然只係造下樣)。
👉👉👉👉👉👉大門若隔開 分隔開👈👈👈👈👈👈
👉👉👉👉👉👉大門若隔開 分隔開👈👈👈👈👈👈
先開路飛太郎...話說呢一隻路飛係小弟係日本嘅細佬送嘅，佢話佢"唔小心"夾左番黎。跟住落黎會開更多親愛弟弟送嘅禮物，大家密切留意啦。
 |
| 來源One Piece Wiki |
超簡單人物介紹: 路飛係草帽海賊團嘅船長，食左橡膠果實所以得到橡膠能力。為人傻頭傻腦但係滿腔熱血、意志堅強、重視友情。夢想係搵到大秘寶One Piece成為海賊王。
盒面見到實物係準備拔刀嘅動作，應該就係還原以下呢一幕。
 |
| (動畫截圖) |
呢個系列嘅索隆我都係超想要，可惜我係日本期間都遇唔到適合入手嘅價錢。已然拜託好細佬幫手留意，希望遲少少有好消息啦。
連底座總共四個部件。底座係DXF系列最基本嘅黑色底座。
安裝刀嘅時要留意，安裝右手之前，先將刀係呢個位插入去。
插好把刀之後先調整右手位置安裝。刀柄軟淋淋嘅設計相信就係為呢個步驟而設。
完成!!
先拍個七分面睇睇，基本上路飛面相都唔會點崩壞。(好難做得唔好...)
下身塗裝有少少泛黃感，有做出殘舊破布嘅感覺。補縫部分只係就咁畫上去，比較可惜。
腳嘅部分吸引到我注意，腳面嘅腳筋做得好真實，草鞋質感非常好。但係草鞋條帶就做得有啲差。
後面見到草帽紋路好仔細，三條傷痕完美還原，質感都非常好。
個人認為刀部分係呢一隻路飛嘅敗筆，塗裝令到成把刀膠味極重。坑紋刻得太深，成把刀感覺好似一條軟皮蛇。
話哂呢把刀唔係咁簡單，劇透部分：二代鬼徹
👉👉👉👉👉👉大門若隔開 分隔開👈👈👈👈👈👈
跟著落黎就係羅啦。
 |
| (來源 ONE PIECE WIKI) |
超簡單人物介紹: 羅(全名︰特拉法爾加．D．羅，唔想記)係紅心海賊團船長，有手術果實能力，外號「死亡外科醫生」。係「最劣世代」十一人之中其中一個，曾經係王下七武海，暫時同草帽海賊團係同盟關係。總係比人冷酷陰險嘅感覺，同草帽一伙相處一段時間之後漸漸展現真性情。
呢一款就係還原和之國篇入面嘅服裝。
 |
| (動畫截圖) |
呢隻羅係以低價入手嘅開封品，但係膠袋都未拆，應該係有人開盒後發現有瑕疵所以賤賣。不過個人認為係可接受範圍。
小知識︰景品類Figure係品質監控上比其他種類差，所以有瑕疵係唔出奇。話雖如此，日本仔對呢啲品質要求好高，景品類品質監控只係比較差，以其他地方標準黎睇其實依然處於高水平。
同樣係DXF標準底座，比起路飛多一件外套。
想試一試唔裝外套，發現完全影響觀賞感。超級A字膊嚴重影響羅嘅形象。相信官方冇諗過俾人拆左件外套。
由於有頂帽遮住個樣，羅嘅面相只帶一個陰影，完美還原動畫入面形象。
睇羅一定睇佢啲紋身先，右手雖然之後會俾外套遮住但都有還原。
左手招牌DEATH紋身當然要還原，手腕位握劍姿勢做得自然。
服裝部分同樣有靠塗裝展現泛黃殘舊感。腳面部分同樣係我覺得做得好好嘅地方。草鞋條帶有做番夾入腳指入面嘅感覺。
有少少刮花左，但感覺唔太影響整體觀感。
鬼哭比路飛把刀做得好好多，感覺似番把刀。紅繩唔知係唔係特別整黑左做殘舊感覺，繩尾有少少自然飄逸感覺。毛毛護刀同毛毛帽嘅質感做得唔錯。
外套相信都係想做飄逸感覺，可惜效果好生硬(通病)，不過都冇乜幾可睇後背。
正面靚仔相一張。
👉👉👉👉👉👉大門若隔開 分隔開👈👈👈👈👈👈
最後合照一張:
路飛太朗︰「出去打飛啲賤人啦~GOZARU!」
羅︰「嗯...」
留言
張貼留言