又一段時間冇見啦，近期出左隻《Marvel's Avengers》嘅遊戲。本住Marvel呢個名，雖然仲未有得用在下最愛嘅蜘蛛俠，不過見有朋友一齊玩就買黎玩下啦。玩落去原來係打怪刷裝嘅遊戲，表現仲強差人意…呢個容後再談啦。講起呢類刷裝嘅遊戲，就不禁令在下想起一隻都係刷裝嘅遊戲 —《Destiny》。今日就回顧一下呢隻盛載住滿滿回憶嘅遊戲啦。
《Destiny》係2014推出嘅第一身射擊遊戲，佢主打多人連線副線副本同埋PVP。遊戲入面有一條主線劇情，但係重點係爆機之後嘅後續故事，需要同其他玩家合作去攻破一啲高難度嘅副本、又或同其他玩家較量，參加PVP對戰，所以真正嘅《Destiny》係玩家爆機之後先真正開始呀。《Destiny》嘅續作《Destiny 2》係2017年推出，遊戲性質維持不變，不過係畫面質素，性能等等都提升唔少。在下係兩代都有玩嘅玩家，曾經為呢個遊戲而瘋狂打機。仲記得玩緊第一代果陣仲讀緊夜校，在下就經常曠課番屋企玩《Destiny》。由曾經試過同另一個唔識嘅玩家合力夜晚玩到第二朝六點就係為左通過個副本究竟呢個遊戲有咩野魔力令在下咁瘋狂呢?
簡單平庸劇情，有深度嘅世界觀
無論一代定二代，故事嘅主線都係差唔多，平平無奇，就係一路打一路打，跟住打Boss，拯救地球爆機，其他角色好似可有可無咁。遊戲走呢個宇宙科幻風本來就相當吸引，故事平凡但係背後其實有一個好有趣好有深度嘅世界觀。故事入面玩家扮演嘅角色叫做Guardians(守護者)，簡單黎講就係為人類而戰嘅戰士，兩代嘅任務都係對抗外星物種嘅入侵。不過背後好多有趣嘅設定就收得好埋，基本上玩家要自己去搵資料先會知，例如Guardians要守護嘅The Traveler、Guardians能力嘅來源light、各個外星種族嘅故事甚至係每一枝槍嘅故事等等係遊戲入面冇交代，玩家要自己上網搵資料，呢一點係在下覺得幾奇怪嘅地方。去到二代嘅某個DLC終於番個似樣少少嘅劇本，但係就賜死左存在感最高嘅NPC Cayde-6。
關於裝備同槍械嘅設計可以睇得出創作團隊嘅創意。大部槍械同裝備都係好特別同有啲好有趣嘅技能，有唔少嘅裝備見到都會會心微笑。在下最有印象嘅一件手甲叫做Don't touch me，技能就係玩家受到近戰傷害嘅時候就會立刻隱形，玩味極重。
呢枝Fatebringer係在下最愛嘅槍，沒有之一，主打技能係如果爆頭擊殺敵人，就會發生爆炸，如果面對一堆好密集嘅敵人就可以電腦大爆炸炸哂全家。除左強大嘅技能之外，係在下感覺用得最順手嘅手炮。可惜佢只有係一代出現。
在下嘅第二愛槍就係呢枝Thorn，識英文嘅都知Thorn係解玫瑰花莖嘅棘刺，主打技係子彈會令敵人中毒，打PVP非常好用。呢枝槍無論外型能力都非常殺食，而且背後仲有一個專屬故事。
每個守護者都係獨一無二
如果玩一個遊戲入面操控嘅角色可以由自己創造，可以同其他玩家有不同，玩落一定更加有歸屬感，對自己創造嘅角色一定更有愛。尤其係呢種要同其他玩家合作或者對戰嘅遊戲，有自己嘅獨特性先唔洗做路人甲。
先講實際啲嘅野，就係技能。《Destiny》入面嘅Guardians可以分成三種職業，Hunter、Warlock同埋Titan，呢三個職業之下再分成三個Subclass(遊戲初期只有兩個)對應唔同屬性專精，Subclass之下再有大量嘅技能可以微調。一聽就知唔同嘅職業或者Subclass都有自己嘅特性，而且佢地嘅特性差別係非常非常之大。尤其玩到後期嘅高難度副本，玩家需要各司其職做唔同嘅事而唔係成班人一齊瘋狂打怪，職業或者Subclass之間嘅分歧就更加顯著。去到二代呢啲技能出現更加多嘅分支，令到玩家有自己嘅獨特性，完完全全地客製化自己嘅角色。
之前就講啲冇咁實際嘅野，就係外觀啦。一開始玩家就可以完全客製化自己嘅種族、相貌等等，而遊戲入面玩家會得到唔同嘅裝備，由頭到腳，呢啲裝備穿戴會真真正正咁反應係玩家嘅外觀上面，以上提到嘅三個職業各自有唔同風格嘅裝備，辨識度非常高。所以玩家可以自由穿搭配搭身上嘅裝備，配襯出唔同嘅效果。除此之外，玩家仲可以為自己嘅裝備配色(包括武器都可以嫁)，玩家就更加容易創造出獨一無二嘅角色啦。
有本事嘅整個Iron-man出黎都得。
玩家嘅靚戰機會係進入任務嘅載入畫面出現，同隊友嘅戰機一齊飛入目標星球，唔洗怕冇機會哂命。
爽快嘅遊戲體驗
再講下個遊戲體驗。在下就覺得遊戲嘅配樂非常有感覺，尤其係一啲緊張驚險嘅場面，遊戲總係配上電影式嘅急促音樂，跟住係破關果一刻圓滑咁轉成治療嘅通關音樂。在下印象最深刻嘅一關就係一代故事初期嘅一場守衛戰，緊張嘅配樂加上當刻場景真係勁有感覺。
輕輕講下發生咩野，由於係故事初期，當時在下比較低等級同脆弱，呢個任務嘅最後一場戰鬥就係抵抗月球種族Hive嘅攻擊。果陣故事發展只係去到地球部分，有啲Hive種族敵人係未見過嘅，兼且佢地嘅攻勢非常猛烈，一架架敵方嘅戰艦不斷出現，真係好緊張刺激。
再睇下畫面方面。以第一代黎講，當時畫面細膩度已經係非常之靚，係大地圖度都可以好清晰。對槍械、裝甲近鏡，各種光影效果都處理得好好，唔講真係以為係睇緊戲。加上故事嘅科幻風，打嘅唔係真槍實彈，槍林彈雨之下嘅畫面變到五光十色咁絢爛，最勁嘅地方就係係畫面處理咁多五顏六色野飛來飛去，但個畫面一樣唔混亂。之後Guardians使用嘅各種能力都有型到震嘅特效，出絕招果陣真係驚天地泣鬼神。
要講爽快體驗，不得不提嘅一個要素就係Feedback，尤其係射擊遊戲，好嘅Feedback會大大提升遊戲爽度。而在下就覺得《Destiny》嘅Feedback系統非常出色，唔同嘅槍種有唔同嘅音效，特效，力度嘅視覺效果都係一流。另外就係命中反饋，《Destiny》嘅爆頭命中特效(或者弱點擊殺)係在下玩過嘅射擊遊戲入面最華麗最爽嘅。
變化多端嘅PVP模式
PVP算係佔呢個遊戲比重幾大嘅部分，有唔少玩家專精於玩PVP，比起對戰電腦敵人，一個真人當然係更加變化莫測，再加上之前講過每一個守護者都係獨一無二嘅，令到PVP戰鬥更加有趣好玩，更加考驗玩家嘅技術。除左對戰真人嘅變化因素，遊戲本身就有好多唔同嘅對戰模式，守點、回合制、死鬥模式等等，玩法多變。除非好似在下咁比較手殘，俾啲高手散彈流狙擊流強暴，PVP係一個好耐玩嘅模式。自己一個玩悶悶地嘅話，PVP嘅組隊可以由1個去到最多6個嘅隊友，可以叫埋朋友入去Gathering呀。
廠商Bungie都會不時Update保持PVP嘅平衡性，仲會新增一啲唔同嘅玩法，例如二代後期嘅Gambit模式將PVP同PVE融合都係一個幾有趣嘅玩法。同埋遊戲不時會舉辦一啲活動，活動獎勵當然係又有型又好用嘅裝備啦。
PVE最高殿堂—Raid
遊戲後面後面嘅副本大致上分為Strike同Raid，佢地都係主線以外嘅額外故事。Strike就係三人成行嘅副本，基本上都係一條直線打怪通關，每個敵人設置唔同，每個Boss嘅對應方法都有少少唔同，一開始玩係幾有趣。但係唔好忘記，呢個遊戲係一個刷裝遊戲，所以好多關卡要不斷重覆重覆又重覆咁打。即使呢啲Strike關卡會出現唔同調節器或者難度提升，打得多都不免乏味。而另一種副本Raid就係一個六人成行嘅副本任(後期有出現三人成行嘅小型Raid，都係同樣有趣)，係在下係呢個遊戲最鐘意嘅部分。同Strike唔同嘅係，Raid唔係一啲直線通關嘅任務，佢嘅玩法有機會癲覆大家對槍Game嘅認知。
Raid嘅任務內容多數都係攻打敵人巢穴，玩法除左打敵人過關之外，就係啟動唔同嘅機關去將所有六個守護者安全又瀟灑地送去下一個關卡，例如曾經有一關要合力造橋。有時係做一啲特別嘅行動過關，例如俄羅斯練膽式嘅傳炸彈，成班人淨雞雞過迷宮。頭目戰亦都唔會好似普通敵人咁簡單，多數都會有一啲特別嘅機制去打，例如有一個Boss只能夠用係敵人手上搶番黎嘅劍傷害，以上種種嘅特別玩法除左考技術仲非常考驗隊友之間嘅默契互相配合，冇溝通係玩唔到嫁。最重要嘅係，以上嘅所以特別野都係冇提示，玩家就係要自己鑽研過關嘅秘訣，識嘅又去教啲唔識嘅過，每次同唔同嘅人合作又會有唔同嘅體驗，即使係同一班人，唔同嘅分工又唔同嘅體驗，真係好過癮嫁。
雖然Raid嘅任務數量係好少(一個DLC只有一個)，但係佢地每一個關卡都係完完全全地唔同，真係睇得出非常有心思。
差嘅地方
然而，呢個遊戲都有一啲差嘅地方嘅，例如﹕
1. 作業感重 — 雖然話多變化，但係PVE部分作業感的確係超重，如果冇朋友一齊刷一齊玩應該好快會棄Game。
2. 睇運氣做人 — 好多強大裝備都係任務完成之後隨機獲得，Nightfall Strike同Raid呢啲專跌勁裝嘅任仲限定每個星期只可以拎一次獎勵，如果唔好彩起上黎，真係打一年都草唔齊全套裝備。
3. DLC太貴 — 呢個遊戲係一個長期戰爭，每隔幾個月就會推出DLC，冇買DLC嘅玩家都可以繼續玩，但係就有好多野都玩唔到，可以話廢左半臂，最慘嘅係啲DLC真係好貴，差唔多成新Game咁貴。
4. 冇朋友好冇癮 — 《Destiny》大部分時間都係三人成行或者六人成行嘅任務，如果成日都組唔到團打真係好冇癮。
5. 中文介面事件 — 呢件係令我嬲嬲地嘅事情，話說二代係有中文繁體版，但係佢嘅中文介面有個載入問題，一直都Fix唔到呢個Issue。所以到最後在下都係玩緊英文版。
小總結
總括呢個遊戲係一個優秀嘅作品，無論係遊戲設計，畫面音效表現都係一絕。同戰友千錘百鍊合力過關亦都帶左好多好美好嘅回憶俾在下，冇乜野做果陣同朋友刷下裝，吹下水都幾寫意。如果《Destiny》會出第三代，在下一樣會埋單。
留言
張貼留言