[送鼠迎牛]鼠年玩過的遊戲大統整

 仲有幾日牛年就來到啦，祝大家牛年龍馬精神、健健康康、一團和氣、貨如輪轉、萬事如意、大吉大利…恭喜發財。

鼠年在下都玩一啲唔同嘅遊戲，今日年廿年廿八洗邋遢，順手回顧一下過去一年在下玩過啲咩野遊戲，有咩野好玩有咩野唔好玩。(未必全部係新Game嫁，可能係一啲久久未開封又或者免費送嘅遊戲)

排序根據在下開始嘅時序

Resident Evil 0

嘩嘩嘩！一黎就黎個復古Game。《Resident Evil 0》係Capcom 2002年嘅作品，但係當時只係係任天堂Gamecube主機上面。由於Gamecube並唔係咁流行，基本上冇乜人玩過。2016年，Capcom 係2016年終於推出PS4嘅Remastered 版本在下先有機會玩得到。不過因為佢沿用舊版本嘅電影運鏡同舊式嘅遊戲操作，習慣左新過肩式射擊鏡頭嘅在下完全對唔順。直到上年，在下先為左劇情強行完成左個遊戲。同一代一樣，劇情同遊戲都係唔錯，如果Capcom要玩重製計劃，不如先重製0代同一代嘅遊戲引擎啦。

Resident Evil 3 Remake + Resident Evil Resistance

可以睇下:"遊戲"Resident Evil 3 Remake 封片文

一齊講因為佢地係綑綁式出現。正傳遊戲之前講過唔多提啦，主要係遊戲畫面提升，不過劇情依然係太短。至於 Resident Evil Resistance 就可以話係正傳遊戲嘅贈品，主打1v4嘅unbalanced PVP對戰。遊戲設計角色意念係唔錯嘅，每個角色各有所長，玩法變數太多。之不過角色之間嘅平衡做得唔好，同埋竟然有等級系統。每一個角色都有獨立嘅等級，愈高等就有愈多強力技能，低等級嘅玩家一定會俾高等玩家折磨至死。最慘嘅係參加對戰就係唯一升等嘅方法，尤其係首腦角色只能夠孤身作戰，一起手根本就玩唔到落去，所以在下並唔推薦。

Final Fantasy VII Remake

可以睇下:"遊戲"《Final Fantasy VII Remake》 封片文

整個鼠年在下最滿意嘅一個遊戲，更加係在下玩過最有誠意嘅重製遊戲。重製劇情將原版故事引領到一個全新嘅走向，仲係最緊張嘅時候完結，真係吊癮吊死人啦。真係好期待跟住落黎嘅部分。(唔知要等幾多年呢) 詳細睇番之前嘅文章。

健身環大冒險

風靡一時嘅Switch遊戲，曾經價錢炒到二倍以上。係結衣BB加持下，在下都入手左黎玩。在下玩過之後，覺得個環嘅技術含量絕對值呢個價錢。而且遊戲入面嘅健身或者健康嘅知識都係好專業，邊個動作練邊舊肌肉都十分清晰，等玩家自訂一啲針對性嘅訓練，就等同買左個私人教練番黎(最可惜冇得Set做美女教練)。對於忙碌嘅都市人黎講，每日抽15-20分鐘健下身，有野玩有野學又練到野，都真係幾唔錯。

The Last Of Us Part II

可以睇下:"遊戲"《The Last Of Us Part II》 封片文 (千祈唔好買)

唉…唔想講。有咩野睇番之前篇文。

對馬戰鬼

可以睇下:"遊戲"《對馬戰鬼》還Game文

俾佢武士道題材吸引左黎玩。玩落遊戲性，畫面角方面表現都相當好。而在下覺得比較可惜嘅係劇情對武士道著墨比較少，主角對武士同戰鬼兩個角色之間嘅掙扎都唔夠細膩，偏偏整個故事係比較冗長，令到遊戲整體失左少少分。

Marvel's Avenger

呢一款真係令人失望至極嘅遊戲。打住Marvel嘅IP，故事劇情方面平平無奇都唔係問題，問題係每一個角色嘅定位同後期嘅關卡設計。每個角色雖然有獨特嘅招式，但係實用性上根本冇專長，完全做唔到Avenger每個角色各展所長嘅合作。加上後期副本關卡有好多，但係完全係千篇一律，幾十個關卡打來打去都係打果三個地圖同兩個Boss，Bug又多到發神經，真係極度後悔買左呢個遊戲。

Styx: Shards of Darkness

呢款好有趣嘅遊戲已經係第二代，可能因為角色造型唔多討好同畫質比較差好似唔太受歡迎。黎到第二集在下再次操控哥布林Styx係敵方陣地之間穿梭完成任務。呢一款遊戲有趣同得在下喜歡嘅地主係佢完美地體現「柳暗花明又一村」呢一句，地國同關卡設計同主角Styx一樣咁鬼馬同精靈，處處有驚喜。令集仲新增左連線系統，等在下可以輕鬆被朋友Carry過關。不過由於難度問題，到而家都未打爆機。

天命2 - 光能以上DLC

由於比Marvel's Avenger 激親，決定回歸《天命》嘅懷抱。離開左《天命》接近年半時間，再次番番高塔發現所有野都好陌生，花左少少時間去適應，認識番一啲新嘅戰友(以前嘅戰友已經離我而So sad)。呢個DLC最吸引嘅地方就係新嘅冰凝副職業，而劇情發展就係守護者開始接觸黑黯力量，係光明同黑暗之間取得平衡(有啲星戰嘅味道)，非常引人入勝。不過玩《天命》故事部分就唔係重點，其他各式各樣嘅活動先係留住玩家嘅內容，在下都認為今個季度嘅內容係比較少同悶嘅。黎緊就係下一個季度啦，希望會啲更好玩嘅內容啦。

P.S. 繁中事件嘅解決方法竟然係PS5，我買唔到呀。

Shadow of the Tomb Raider

呢隻係最近先接觸嘅遊戲，係PS plus嘅免費遊戲。在下只係玩左少少，感覺唔錯嘅。遊戲性操控都幾唔錯，開放式地圖方便去四周圍探險，內容都幾足夠，只係暫時劇情嘅表現在下覺得好多地方都好牽強。由於冇玩過Tomb Raider其他遊戲，所以難以比較，暫時玩落模式比較接近《Uncharted》。

以上就係在下鼠年玩過嘅一啲遊戲，有啲有驚喜，有啲就令人失望。新嘅一年希望買到PS5同玩到更多正Game啦，恭喜發財。